Kalaallit Dana Cupimut peqataajartutut arlaqartut
Kalaallit inuusuttuaqqat arsaattartut ulluni makkunani Hjørringimiipput Dana Cupimi peqataaniarlutik. Tassani 1.114-it holdit nunanit arlalinneersut peqataassapput.
K-1933-p arnartaasa inuusuttortaasa holdiat unammissutissamut piareersimavoq, tassanilu Norgemiut holdiannik Dana Cup-imi Hjørring-imi naapissavaat.
Privat
K-1933-p niviarsiarartai U16 nunatsinni Qaqortumiit Danmarkimi Hjørringimut angalapput Dana Cupimi 22.-27. juli peqataaniarlutik. Unammiartut piareersimalluinnartut, unammiartunut angalaqataasoq Aviâja Kielsen Andersen oqaluttuarpoq:
- Inuusuttuaqqat qilanaarsimaqaat, unammisarnerillu sioqqullugit sungiusarluarsimallutik. Dana Cupimi norskinut unammissapput. Arlallit Danmarkimut aatsaavissuaq angalapput. Taamaattumik pingaartipparput nuannersumik misigisaqartinnissaat, Aviâja Kielsen Andersen Sermitsiamut oqarpoq.
Pitsaaliuinermut iluaqutaasoq
Ukiuni kingullerni K-1933-imi timersortarnerit annertusarneqangaatsiarput. Aviâja Kielsen Andersenip meerai aamma arsaattarsimapput, taannalu isumaqarpoq timersorneq pitsaaliuinermut periarfissiisut inuusuttullu Qaqortumi ataatsimoornerannut aqqutissiuisuulluni.
- Inuusuttuaqqat periarfissaqarluartinneqarnerat pitsaasuuvoq. Nivissat siullerpaamik Dana Cupimi peqataalerput, tamannalu inuusuttunut kajumissaataavoq timersornermut peqataanissamut, oqarpoq Aviâja Kielsen Andersen.
Dana Cupimi ulluni 22.-27. juuli unammisoqassaaq, tassani nunanit assigiinngitsuni arsaattartut iligiiaat 1.114-it peqataassallutik.
B-67-ip Facebookimini nalunaarutigaa nivissat nukappissallu ukioqatigiiaat arlallit unammiartissallugit. Taamaalilluni B-67 Nuummeersoq unammisartunik 100-t sinnilaarlugit peqataatitaqarpoq.
Dana Cupimi eqimattakkaarluni unamminerit aallarteriarlugit, arfininngornermi 26. juuli pissartanngorniutivinnerit ingerlanneqassapput.
