Kalaallit Danmarkimut ajorsarput
Kinami nunarsuarmi pissartanngorniuttoqarnerani Danmarkip Kalaallit Nunaat 42-8-mik ajugaaffigaa.
Assiliisoq: TAAK
Kalaallit assammik arsartartut niviarsiaqqat tallimanngormat Kinami nunarsuarmi pissartanngorniuttoqarnerani sakkortuumik unammillerteqaqqipput.
Tamatumuuna Danmark unammivaat, tassanilu 42-8-mik ajorsarput.
Assammik arsartartut kattuffiat TAAK tusagassiuutinut nalunaarummi taama allappoq.
Unammisartut ilungersorlutik unammisimasut, sungiusaasoq Victoria Svendsen oqarpoq:
- Taamaakkaluartoq assersuinermi kusanartumik takutitseqaat. Qallunaat sukkasuumik saassussineri peerutsigit, Danmark amerlagisassaanngitsunik nalinginnaasumi saassussigaangamik isertitsinngillat, assersuilluaraangattalu aamma mål-iniittut tigusassatik annattarpaat.
- Saassussigaangattali qallunaat sassasissumik assersuisarnerat ajornartorsiutigisarparput, amerlavallaanillu kukkussuteqarpugut.
Nunat allat piareersartarnerannut piareersartarnertik sanilliutissagunikku, unamminermi kukkullattaarnissamut sillimasariaqarlutik, nunanut allanut unammisartunut sungiusaasoq nangilluni oqarpoq.
- Kisianni unammineq tamaat, 60 minutsit, kusanartumik akiuulluaqaagut, unamminerniillu unamminernut pitsanngoriartornerput takusinnaavarput. Uani unamminermi iluatsittut aallarniutaasumik unamminermut kingullermut aqagu unamminissatsinnut nassassavavut, Victoria Svendsen oqarpoq.
Aqagu unammisassat tassaapput Kinesisk Taipai ullaakkut nal. 09.00, uanilu gruppemi nr. 3-ngorniunnerussaaq.
