Kalaallit Nunaat bronzennallunilu akiniaasoq
Assammik arsartartut nunanut allanut unammisartui Mexicomi unamminerit naammassilluarpaat, USA-mullu ajugaagamik bronzennapput.
All Star-it Minik Dahl Høegh Milan Olsenilu
Assi: Berit Duus
Mexico Citymi OL-ip illoqarfiani nunarsuarmi pissartanngorniunnissamut anngunniunnermi arfininngormat unnukkut USA-mut ajorsarneq pissutigalugu, Kalaallit Nunaat nunarsuarmi pissartanngorniunnissamut peqataassanngilaq.
Bronzennanniunnermi USA unammeqqinneqarpoq, kalaallilli unammisartuisa nuannaarnerat allaanerussutaavoq, ippassaammamummi sanilliullugu ajugaagamik.
Unammineq pissanganartoq
Sapaatip-akunnerata ingerlanerani kalaallit arfinilissaanik unamminerat takuneqarsinnaanngilaq. Tamanna isertuulluarpaat. Ippassaammat ajorsarnertik, Kalaallit Nunaata finalimut anngutinnginneranik kinguneqartoq, akiniaassutiginiarlugu unamminerup aallartinneraniilli aalajangersimapput.
Minik Dahl Høegh ujaminnattaani pokalinnattaanilu
Assi: Berit Duus
Unamminerup immikkoortuani siullermi Kalaallit Nunaat målinik sisamanik siuaqqavoq, muminnermilu målinik pingasunik siuaqqalluni, 15-12-imik.
Unamminerup immikkoortuata aappaani Kalaallit Nunaat 21-16-imik siuarpoq, USA-lli unammineq ingerlateqqilerpaa 22-22-millu naligiilersillugit. Unamminerup naammassiartuaarnerani pissanganartumi USA arlaleriarluni målimik ataasiinnarmik kinguaqqavoq. Minutsinili kingullerni USA ajorsartinneqarpoq. Unammineq naammassimmat 29-24-mik Kalaallit Nunaat ajugaavoq.
Soorunami nuannaarneq annertoqaaq. Minutsit 30-t marluk ingerlanerini unammisut tamarmik sapinngisaminnik iliuuseqarmata takutitsilluartoqarpoq pissanganartorpassuaqarlunilu. Minnerunngitsumik målmandip Isak Olsenip annaassilluarneri Kalaallit Nunaata ajugaaneranut pissutaaqataapput.
Nersorneqarneq annertooq
Assammik arsarluni unammiuaarnerni angisuuni ujaminnatsitsisoqaraangat, pissusissamisoortumik All Star-it toqqarneqartarput. Inissisimaffinni assigiinngitsuni unammisartut pitsaanerpaat. Mexico Citymi unammisartut akornanni kalaallit marluk all star-inngorput:
Minik Dahl Høegh backitut saamerlermiutut pitsaanerpaatut, Milan Olsenilu isertitseriartartutut pitsaanerpaatut toqqarneqarput. Minik Dahl Høegh unammiuaarnermi isertitsinerpaagami pokalimik allamik tunineqarpoq.
Unammiuaarnermi Cuba ajugaalluinnarpoq
1. Cuba
2. Mexico
3. Grønland
4. USA
5. Puerto Rico
6. Canada
Unammiuaarnerni Cuba ajorsanngiivippoq, taamaattumik VM-imut peqataanissaat naleqqulluinnarpoq.
Milan Olsen ujaminnallunilu pokalinnattoq.
Assi: Berit Duus
Mexico, Kalaallit Nunaat USA-lu tamarmik arfinilinnik pointinnapput. Mexico isertitsilluarnerugami Cubamut finalerpoq.
