ASSAMMIK ARSARNEQ
Kalaallit Nunaat Puerto Rico-mut ajugaavoq
Ajugaanerlu pisariaqarpoq, VM-imut peqataanissamik anguniagaqarneq piviusunngortinneqassappat.
Kalaallit Nunaat sinnerlugu unammisut qaqortunik atisaqarput Puerto Ricomut unamminerminni tassami Puerto Ricop unammisartui Kalaallit Nunaata unammisartuisut aappaluttunik atisaqartaramik.
Assiliisoq: Berit Duus
Puerto Rico ajugaaffigisariaqarparput, nunanut allanut sungiusaasoq Johannes Groth ippassaani uagutsinnut oqarpoq , nunanullu allanut sungiusaasoq oqaatsini piviusunngortippai. Kalaallit Nunaat ajugaaniutivinnermini unamminerni sisamaasuni pingajussaa ajugaavoq , anngunniulluni unammisaqattaarnerit naggataanni VM-imut bilitsinik pissarsisoqarsinnaavoq.
29-22 unamminerup naammassinerani taamak timersortarfiup angusanut allagarsiiviani allassimavoq, Mexiko Citymi illoqarfimmi olympiskiusumi, dommerit marluk unamminerup naammassinera nalunaarutigimmassuk.
Kalaallit Nunaat unamminerup minutsiniini 60-iusuni siuarsimaannavippoq.
Unamminerup naammassinissaanut minutsit qulit sioqqullugit Puerto Rico pissanganartorsiortitsivoq.
Kalaallit Nunaat - Puerto Rico
Kalaallini isertitsisut:
Minik Dahl Høegh, 5
Pele Lynge, 5
Angutimmarik Kreutzmann, 4
Kuutak K. Olsen, 4
Malik Andersen, 3
Lars Ole Lyberth, 2
Steen Kleist Møller, 2
Miki A. Heilmann, 1
Milan Olsen, 1
Noah John Davidsen, 1
Knud Skifte, 1
Unamminissaq tulleq unnugu USA-mut, nal. 21.00 (Nunatta nalunaaqutaa)
Tusarfik: Kalaallit Assammik Arsartartut
Tassani Kalaallit Nunaat pingasuinnarnik siuarsimaleraluarpoq 22-19-mik killiffeqarluni. Taamaattorli Kalaallit unammisartut qaqortunik atisallit sukataaleqqipput, taamaalillutillu puertoricanernit siuariartorqqilernerungaatsiarlutik, unamminerup inernerani målinik qulingiluanik siuarsimallutik ajugaapput.
Tupaallannaannartumik ingerlalluarpoq
Unamminerup kingorna Kalaallit Nunaata anføreria Minik Dahl Høegh Sermitsiamit oqaloqatigaarput.
- Unammisugut tamarmik unammeqataanerminni peqataalluarput, tamannalu pingaaruteqarluinnarpoq, sulimi aamma unamminerit marluk ajornakusoortut utaqqipput. Siullermik unnugu USA-mut kingornalu neriuutigeqaarput sapaatiuppat anngunniutivinneq angujumaarlutigu.
- USA ajornartorsiutaassaaq. Taakku suli ineriartortunik unammisartoqaraluarput, kisianni pikkorissuupput. Mikisut sukkasuumillu eqqarsartaatsikkut pikkorissutut unammisut, taamaattumik ullormi tassani eqqortumik pinngikkutta illersuinissatsinnullu piareersimassanngikkutta, målimi pitsaasumik annaassisaqattaanngikkutta angusaqarluarnissatsinnullu periarfissat atorluanngikkutsigit, ajornartorsiutigisinnaavavut, Minik Mexico Citymiit oqarasuaatikkut oqarpoq.
- Inuttut tupigusuutigaara maannamut qanoq annertutigisumik ikiuussimanera. Ukiuni kingullerni ajoqusertarnikuuvunga, kisianni maannakkut ajunngilanga.
Assammik arsartartutut ukiut ingerlanerini timima tamaviaartittarsimanerata erserneri maanna takussaasalerput , kuisinnermut uppernarsaammi takussaalerpat 39-nik ukioqalersimaneq. Tupigusuutigineqarpoq Minik suli taamak nukittutigimmat isertitseriartarninilu sakkortuut suli ingerlassinnaammagit, taanna Danmarkimi klubinit anginersaanni peqataasareerluni maanna Amo Handboldimut Alstermomi illoqarfimmi Sverigip kangiatungaaniittumi unammisartuuvoq.
VM-mut takorluukkat
- Ilaquttakka uangalu Sverigemiinnerput assut nuannaraarput. Maanna tassani klubimiinnera ukiumik ataatsimik ilaqqeqqammerpara. Sungiusaasumut ikiortitut inissisimalissaanga. Taassumalu saniatigut timiga aalajangissaaq nutaamik pisoqassanersoq.
- Soorunami, unammisartuunera VM-imi aappassaa unammersuaqataallunga naammassisinnaagukku tulluusimaarnassagaluaqaaq. 2007-imi Tysklandimi VM-ertoqarnerani Kalaallit Nunaat peqataaffigaara, kisianni taamani maannakkutut pikkorissuseqartigalunga arsaattartuunngilanga.
- Taamaattumik uannut annertoorujussuussagaluarpoq iluatsissinnaagutsigu, Miniup oqaloqatigiinnerput naggaserpaa.
Kalaallit Nunaat unnugu nal. 21.00 USA-mut unammissaaq. Finalimut anngutissaguni Kalaallit Nunaat ajugaasariaqarpoq, tamatumalu saniatigut Mexicop Cubamut ajugaannginnissaa pisariaqarpoq.
