Karateklubbi Nuummeersoq DM-imi ujaminnarujussuartoq

Nuuk Shotokan Karate-do-mi karatertartut qulingiluat Shotokan Karate-mi DM-imi peqataaqqammerput, pissartanngorniunnermilu angusarissaartut Nuummut ujaminnattaaminnik nassataqarluarput.

DM-imi unammeriaatsit 'kata' aamma 'kumite' unammissutigineqarput, timersoqatigiiffillu tusagassiuutinut nalunaarummi ilisimatitsivoq peqataasut tamarmik piareersarluarsimallutik unamminissamullu piareersimalluarsimasut.

Timersortartut peqatigiiffiata unammiuaarneq sioqqullugu sungiusarnerit nalinginnaasut saniatigut Islandimi sapaatip-akunnera ataaseq sungiusarnissamik aaqqissuussisimavoq, tassanilu DM-imi peqataasut Islandimi nunanut allanut unammisartunut sungiusaasumit Magnus Eyjolfssonimit ilisimasaqarluartumik siunnersorneqarluarsimallutik.

Piareersarluarsimaneq kinguneqarluarpoq, tassami Odensemi DM-ertoqarnerani kuultinik marlunnik, sølvimik ataatsimik bronzenillu tallimanik ujaminnattoqarmat:

- Peqataasut tamarmik takutitsinertik tulluusimaarutigingaarsinnaavaat, unamminermimi sukataarlutik unammilluaramik, timersortartut klubbiat allappoq.

Klubbit ajugaanerpaat arfineq-pingajuattut inissittoq

Nuuk Shotokan Karate-Do ilisimatitsivoq unammiuaarnermi, 250-it sinnerlugit klubbinillu 20-nit amerlanerusunit peqataaffigineqartumi, klubbit ajugaanerpaat arfineq-pingajuattut inissisimalluni.

Ukiut aappassaa Nuummi timersoqatigiiffik DM-imut peqataavoq, angusarissaarnerillu peqataaqqinnissamut sapiissuseqalersitsipput:

- Timersortartut klubbianni piginnaasaqarluartunik unammisartoqarlualilerpoq. Ilisarisimanngisamut unammineq ilikkagassarpassuaqarnarpoq, sungiusaasoq Kasper Dyrberg oqarpoq, taassumalu inuusuttut unammiuaarnermut ilagai.

Angusat:

• Peter Molich Katami Kumitemilu kuultinnappoq
• Liv Molich Katami sølvinnappoq
• Benjamin Malek Pour qulingiluanik ukiulik Katami Kumitemilu bronzinnappoq
• Rasmus Tang Friis Katami bronzinnappoq
• Melanie Fjordside Katami bronzinnappoq
• Kasper Dyrberg Kumitemi bronzinnappoq