Naak ajorsaraluarlutik suli isumalluarput

Sapaatiuppat kuultinnanniuttoqarnissaata, sølvinnanniuttoqarnissaata bronzennanniuttoqarnissaatalu tungaanut unamminissat kingulliit marluk, unammisartut tamarmik qilanaaraat. Unnugu Puerto Ricomut unammeriarlutik arfininngorpat unnukkut USA-mut unammissapput.

- Finalernissarput suli upperaarput, nunanut allanut unammisartut sungiusaasuat Johannes Groth, nunanullu allanut unammisartut playmakeriat misilittagaqarluartoq isumassarsiullaqqissorlu Miki A. Heilmann, nittartakkamut aviisimut Sermitsiamut oqarput.

Citius Altius Fortius

Mexico Citymi 22 millionit missaannik innuttalimi OL-ip illoqarfianut isaarissami oqaatsit uku allassimasut latiinerisut isumaat tassaapput „sukkanerusumik, portunerusumik nukittunerusumillu". Oqaatsit taakku pingasut ullumikkut assammik arsarnermut aamma tunngapput. 1968-imi OL-imi timersortartut najugaqarfigisaanni nunanut allanut unammisartut najugaqarput.

-Ineeqqami ataatsimi sisamaalluta najugaqarpugut, Miki A. Heilmann oqaluttuarpoq nangillunilu:

-Matut silataanni paarsisut inissisimapput. Mexicomimi pingerluttoqangaartartoq ilisimaneqarpoq. Qujanartumik suna tamarmi qanipparput, taamaattumik ungasissumukartariaqartanngilagut.

Nunanut allanut sungiusaasoq Johannes Groth

-Cubamut ajorsaraluarluta unammineq ajunngeqaaq. Naatsorsuutigisimasaannit allatut arsarluta tupaallatsippavut. Paasivarputtaaq unammeriaatsinut ilimagineqanngitsunut pikkorippallaanngitsut. Taamaattumik Cubamut finaleriasaassagutta ajugaaffigisinnaalluarpavut, ingerlalluaannaruttami finalerfigissagunarpavut, Johannes Groth naqissusiivoq.

Pingasunngormat unnukkut unamminertulli finalemi arsartunik sipaartoqassanngilaq.

- Taarsersinnaasavut tamaasa taarserpavut nukiillu sipaarlutigit. Minik Dahl Høegh Sverigemi unammisartuuvoq 39-nik ukioqarluni, unammisartuunermilu unammisaqattaartarnini sungiusimavaa. Cubamiunut unamminitsinni sakkortunerusumi Canadamut Mexicomullu unamminitsinni siullerni nukippassuit atorsimallutigit malugisinnaavarput.

Assammik arsartartut siunissaat isumalluarnarpoq. Pikkorissut amerlaqaat. Taakkua ilaat pingasut Ikastimi ulluinnarni unammisartuupput atuarlutillu. Sebastian Jensen Mexicomi peqataasoq taakkua ilagaat. Ukiumi unammiffiusumi aggersumi allat marluk Ikastimut ingerlaqqissapput.

- Puerto Rico unnugu ajugaaffigissavarput. Arfininngorpat USA-mut unamminermi aamma kalaallit ajugaanissaat upperaara. USA inuusuttunik nunanut allanut unammisartuutitaqarpoq. Taakkua nunanut allanut unammisartui Europamiipput. Tamanna Mexicomi unammiuaartitsinissamik aaqqissuisunit nuannarineqarpianngilaq.

- Naatsorsuuinikka eqquutissappata soorunami Cuba Mexicomut ajugaasariaqarpoq, Johannes Groth naggasiivoq.

Miki A. Heilmann

Nunanut allanut unammisartut playmakeriat misilittagaqarluartoq arsallaqqissorsuarlu 35-nik ukioqaleruttorpoq, 2007-imilu Tysklandimi VM-ertoqarneraniilli nunanut allanut unammisartuusimavoq. Ajoqusersimanerili pissutigalugit piffissap ilaani nunanut allanut unammisartuusimanngilaq. Miki A. Heilmann nunani allani najugaqarluni unammisartuusinnaanikuugaluarpoq.

2014-imi januaarimi Danmarkimi taamanikkut arsaattartoqatigiit pitsaanerpaat KIF Kolding København misiliummik sungiusaqatigai, Nuummili sinaakkutit sungiusimasat salliupput.

- Soorunami ilaannikkut tamanna eqqarsaatigisarpara, Miki A. Heilmann oqarpoq.

Miki A. Heilmann sungiusarluarsimajuaannarpoq. Ukiorpassuarni sungiusartarnini nakkutigisimavaa. Ajoraluartumik siutimigut ajornartorsiuteqarpoq. Qujanartumik qaammatit pingasukkaarlugit misissorneqartarneq pissutsinik pitsaasuutitsivoq.

- Suli ukiualuit nunanut allanut unammisartuunissara naatsorsuutigaara, soorunami timima qanoq innera apeqqutaalluni, Miki A. Heilmann, pingajussaanik nunanut allanut unammisartut ilagalugit Mexico Citymiittoq, naggasiivoq.