Niviarsiaqqat iligiit marluk arsaannermik unammiuaarnermi nunanit tamalaanit peqataaffigineqartumi peqataassapput

Niviarsiaqqat iligiit marluk juulimi Dana Cupimi peqataalerunik immikkut ittumik misigisaqarnissartik qilanaarisinnaavaat.

Dana Cup tassaavoq inuusuttut arsaannermik unammiuaarnerat nunanit tamalaanit peqataaffigineqartartoq, ukiut tamaasa juulip naanerani Hjørringimi ingerlanneqartartoq.

Suliffeqarfiit Arctic Import aamma Hørkram Foodservice aningaasaliinerat pissutigalugu, niviarsiaqqat iligiit taakkua marluk peqataasinnaasimapput.

Tamanna tusagassiuutinut nalunaarummi ilisimatitsissutigineqarpoq.

Inuusuttut timersornerat, ingammik niviarsiaqqat timersornerat, suliffeqarfiit aningaasaliinermikkut tapersersorlugulu ineriartortikkusuppaat:

- Suliniummut taama pingaaruteqartigisumut peqataaneq nuanneqaaq, inuusuttut timersortartut, ingammik niviarsiaqqat, nukittorsarnissaannut toqqaannartumik peqataasinnaagatta, taamaalillutalu timersornerup naligiinnermik periarfissanillu immikkorluinnaq ittunik pilersitsisinnaaneranik erseqqissaalluta, Henrik Kronborg, Arctic Importimi tuniniaanermut pisortaq, nalunaarummi oqarpoq.

Siorna kalaallit iligiivi arlallit, ilaatigut B-67-imeersut tallimat, Dana Cupimi peqataapput.