Nunanut allanut unammisartunut sungiusaasut siuttuat Nuummi oqalugiassaaq

UNICEF-ip aallartitaa Kasper Hjulmand Nuummut tikeraassaaq oqalugiassallunilu qulequtaralugu: Kuulti ulluinnarni pilersinneqartarpoq.

- Unicef-ip aaqqissuussinermut immikkut ittumut matumunnga qaaqquaatit, tassani Kasper Hjulmandip arsaattarfiup iluani avataanilu isumaliutersuutai, meeqqanik isumassuinera, tamatta inuiaqatigiinnut nukittunerusunut akuunerulersimasunullu qanoq tapersersuisinnaasugut pillugit oqaluttuarneranut tusarnaarnissamut periarfissaqassaatit, Mads Mitchell Hotel Nordbomeersoq, aaqqissuussinermik aningaasaliisoq, oqarpoq.

Akeqanngitsumik aaqqissuussaq

Aaqqissuussaq akeqanngilaq, peqataasinnaasulli killeqarmata peqataarusuttut siumoortumik nalunaaqquneqartut ilisimatitsissutigineqarpoq. Oqalugiarneq pissaaq Hotel Norbomi apriilip pingajuani nal. 16.30.

- Kasper Hjulmand ilisimaneqarpoq aqutsinermi inuk qitiutillugu periaaseqartarami, upperalugulu arsaattartoq arsaattarfiup iluani avataanilu iluatsilluarnissamut kinaassutsiminik paasinninnissaq ineriartortitsinissaalu pingaaruteqartuusoq. Oqalugiaammi matumani paasisaqarfigissavatit Hjulmandip aqutsinermut periaasii, piginnaasaqarluartunik ineriartortitsinissamut takorluugai, nunarsuarmilu tamarmi meeqqat inuusuttullu peqataatinnerulernissaanut isumaliutersuutai, nassuiaammi allassimavoq.

- Aaqqissuussamut tamatumunnga peqataaneq tassaaginnanngilaq arsaannermi ataqqisaanerpaap oqaasiinik paasisaqarnissannut periarfissaq, aammali tassaavoq Ataatsimoorluta Aalasa, suliniut meeqqanut toqqissisimanartunik peqataatitsilluartunillu timersoqatigiinnik pilersitsinissamik siunertalik, tapersersornissaanut paasisaqarnerunissannullu periarfissaq.