Nuummi tilluuttartut nukittunerat piumassuseqarnerallu Amerikamiut sungiusaasuata tupigusuutigaa
Tilluuttartut Nuummiut USA-mi tilluuttartut arfininngormat unnukkut unammigamikkit unamminerni arfineq-marluusuni pingasut ajugaaffigaat. Amerikamiut tilluuttartut sungiusaasuata Jackie Atkinsip kalaallit tilluuttartut piumassuseqarnerat minnerunngitsumillu kalaallit tikilluaqqusinerat tupigusuutigaa.
- Tilluuttartutta kalaallit tilluuttartut taama nukittutiginissaat unammillerumatutiginissaallu ilimagisimagunanngilaat, amerikamiut sungiusaasuat Jackie Atkins oqarpoq.
Assi: Privat
Tilluuttartut Nuummiut arfineq-marluk Danmarkimeersullu ataatsip Amerikamiut tilluuttartut peqatigiiffiannit Park Elite Boxing Academymit New Jerseymeersumut Nuup Timersortarfissuani arfininngormat unamminerat, tilluuttartut sungiusaasuinit marlunnit sapaatiummat naammagisimaarneqarpoq.
- Sungiusaasuulluarpunga! Tilluuttartut Nuummiut Fight Club Nanumeersut sungiusaasuat Mahmoud Minaei oqarpoq.
Tilluulluni unammisitsineq iluatsilluartoq isiginnaartunillu nuannarineqarluartoq Mahmoud Minaei oqaluttuarpoq.
Ajugaanerit pingasut
Nuummiut tilluuttartut pingasut — Luca Sikemsen, Paalu Rosing Johansen aamma Anguteeraq Pedersen — unamminerminni ajugaapput, tamannalu sungiusaasuata nuannaarutigaa:
- Torraalluinnarpoq. Nassuiaruminaappoq sungiusaasutulli nuannaarutigaara.
- Sungiusarluarnikuuvugut. Sapaatip-akunneranut arfinileriarluta qaammatini pingasut ingerlaneranni sungiusartarpugut, taamaattumik piareersarluarsimavugut, oqarpoq.
Inuussutissarsiutigalugu tilluuttartoq Frank Madsen Nuummi siorna novembarimi tilluukkiartormat Amerikamiunik unammisoqarnissaa piviusunngorsimasoq Mahmoud Minaei oqaluttuarpoq.
Tilluutereernerup kingorna USA-mi klubbimit sungiusaasumit Jackie Atkinsimit, aamma USA Boxingimi New Jerseymi præsidentiusumit, attaveqarfigineqarpoq.
Tilluuttartut Nuummiut piumassuseqarnerat nukittunerallu tupaallaatigigai
Jackie Atkinsip sungiusaasoqatini assigalugu arfininngormat unamminerit naammagisimaarlugillu kalaallit tilluuttartut nukittussusiat tupaallaatigisimallugu Sermitsiamut oqarpoq:
- Tilluuttartutta kalaallit tilluuttartut taama nukittutiginissaat unammillerumatutiginissaallu ilimagisimagunanngilaat, tilluuttartummi misilittagaqarpiannginnerat pissutigalugu.
- Tilluuttarnerminni assigiinngilluinnarput, nukitilli piumassuseqarnerallu ajugaanissaminnut iluaqutigaat. Nukittoqaat tilluarneqarnertillu akiorsinnaallugu, Jackie Atkins oqarpoq.
Nuummiut tilluuttartut USA-mut qaaqquniarai
Amerikamiut tilluuttartut sungiusaasuilu tamarmik Kalaallit Nunaanni tikilluaqqusaalluarnerat Amerikamiup sungiusaasuata aamma nuannaarutigaa.
- Misigisaq immikkuullarippoq. Inuusuttorpassuit timmisartornikuunngillat, taamaattumik nunamut allamut tikillutik taama tikilluaqqusaalluartigineq isiginnaarianiillu taama tapersersorneqartigineq nuanneqaaq.
- Inussiarnisaarfigineqarneq nuanneqaaq, Jackie Atkins oqarpoq. Taassuma tilluuttartut klubbiat aqqutigalugu meeqqanik atugarliortunik sullissisarpoq.
Nuummut qaqugukkulluunniit uterumaarluni oqarpoq, maannalu Mahmoud Minaei aamma Flight Club Nanoq USA-mut qaaqquniarlugit suliniuteqarluni.
- New Jerseymi marlunnik sungiusartarfiuteqarpunga, tassungalu Mahmoud tilluuttartoqataalu qaaqqussavakka. Tikilluaqqusaalluarnikuunerput akiniarniarlugu.
Kajumissutsimik sulisunit suliffeqarfinniillu tapersersorneqarluartut
Tilluunneq illoqarfimmi suliffeqarfiit amerlasuut kajumissutsimillu sulisut ikiuilluarnerat pissutigalugu piviusunngortinneqartoq Mahmoud Minaei oqarpoq.
- Qujamasoqaanga, uagutsinnut pingaaruteqaqaaq.
- Misilittakkanik ilikkakkanillu nutaanik pivugut. Inuusuttullu tikeraat ikinngutigilerpaat, sungiusaasoq oqarpoq.