Nuummi unnuarissat nalliuttorsiorput

Unnuarissat nalliuttorsiorput, Nuummimi peqatigiiffik Unnuarissat pilersinneqarnerannit manna ukiut 25-t qaangiupput. Tamanna Erik Thorstedip Fonden for Socialt Ansvarimeersup aaqqissuussaannik innuttaasut ataatsimiitinneqarnerisa kingorna ulloq 7. September 2000 pivoq.

AAMMA ATUARUK

Natteravne pilersinneqarpoq Sisimiuni

– Kingorna unnuarissat Nuummi, Nuussuarmi Qinngutsinnilu aqqusinermik takussaallutik toqqissisimatitsisarput. Inersimasut nammineq piumassutsiminnik suliniartut meeqqanik inuusuttunillu – ataqqinnillutik, qanilaarlutik tikkuussiniarfiunngitsumillu naapitsisarput. Inuusuttut inersimasunik oqaloqateqarnissamik pisariaqartitsineranni naapitassaasarpugut, ajornakusoortunik pisoqarnerani naalaartarluta tapersersuillutalu – immaqalu aamma mamakujuttunik agguaassisarluta, Unnuarissat allapput.

Nalliuttorsiornermut atatillugu Nuummi Unnuarissat arfininngornermi ulloq 6. September nal. 11.00-mit 14.00-mut Nuuk Centerimi soqutiginnittunut tamanut kaffillissapput.