Polar Seafood Elite Sport Greenlandimut aningaasaliisunngorpoq

Isumaqatigiissut nunatsinni periarfissanut suliniutinullu, soorlu ilaatigut piukkunnaatilinnik ineriartortitsinerup iluani qulakkeerinneqataassasoq, Elite Sport Greenland tusagassiuutitigut nalunaarummi allappoq.

Polar Seafood Kalaallit Nunaanni suliffeqarfik inuiaqatigiinni suliniutinillu peqqinnikkut kiisalu ineriartortitsinernut tapersersuisarpoq, Elite Sport Greenland allappoq.

Suleqatigiissummik isumaqatigiissusiornikkut Polar Seafood timersorrtartut timersornikkut pisinnaasaat qaffasinnerpaamik angunissaannut periarfissiissaaq.

 - Siunissamut Kalaallit Nunaanni timersornikkut aningaasaliiffiginnissalluta periarfissatsialattut isigaarput, Bent Salling, Polar Seafoodimi pisortaq oqarpoq nangillunilu:

- Piukkunnaatilinnut ineriartortitsineq qulakkeerinneqataassaaq, Kalaallit Nunaanni inuusuttut pitsaanerpaamik soqutigisaminnik angusaqarumallutik ukkatarinninnissaannut. Nuannaarutigaarput Elite Sport Greenland suliaannut piukkunnaatilinnut pikkorivissortunullu suliaqarnerat tapersersorsinnaagatsigu.

Aningaasaliinermut isumaqatigiissut piffissami aggersumi periusissiornissamut nunatsinni ineriartortitsinissamut ilaatigut inuusuttunut periarfisseeqataassaaq. Polar Seafood suleqatiginerisigut siunissamut pissanganartumut suliniutissanut ilaatigut piukkunnaatilinnik ineriartortitsinermut sunneeqataassalluni.

 - Polar Seafood aningaasaleerusunnera nuannaarutigisorujussuuarput. Piukkunnaatilinnik ineriartortitsineq pingaartitaasa ilagisaat naapertuuppoq anguniakkatsinnut nunat tamalaat unammersuarnerinut peqataasarnissamut aqqutit ilagigaat piukkunnaatilinnik ineriartortitsineq. Ataatsimut piukkunnaatillit tapersersorneqarnissaat eqqortumillu sinaakkuteqarnikkut ilaatigut angusaqarsinnaanissaannut qulakkeernissaa qanillattorsinnaallugu, Elite Sport Greenlandip siulittaasua, Angutinnguaq Hegelund-Tittussen oqarpoq.