Qallunaat nunanut allanut unammisartuisa tujuuluaraanni kalaallisut allassimasoqartoq

Arsaattartut klubbiat FC Nanoq Danmarkimi arsaattartut nunanut allanut unammisartuisa tujuuluaraanni ilisarnaataasut ilagaat.

FC Nanoq (assip qeqqaniittoq) nunanut allanut unammisartut tujuuluaraanni nersorniarneqartut ilagaat.

Isikkamik arsaannermi EM-ertoqaleruttorpoq, qallunaallu angutit nunanut allanut unammisartuisa tujuuluarai kalaallisut ilisarnaateqarput.

Nunanut allanut unammisartut tujuuluarai ukioq manna saqqummersinneqartut Danmarkimi timersoqatigiiffinnut assigiinngitsunut, ilaatigut FC Nanormut, ataqqinaataapput.

FC Nanoq Valbymi Kløvermarkenimi nammineq unammisarfeqartoq Danmarkimi kalaallinit, soorlu kalaallinit ilinniagaqartunit inunnillu Kalaallit Nunaannut attuumassuteqartunit allanit, ilaasortaaffigineqarpoq.

Timersoqatigiiffiit 1535-t DBU-mut ilaasortaasut taaguutai tujuuluaqqat mumingani naqitaapput, atisaliortartumit Hummelimit ilusilersorneqartut.

Ukiunik 45-nngortorsiorluni nalliuttorsiortoq

- Qallunaat arsaattartut klubbii 1.535-t tamarmik taaguutai nunanut allanut unammisartut tujuuluaraannut ilanngunnerisigut kajumissutsiminnik sulisut, arsaattartut najukkamilu innuttaaqatigiit amerlasuut ullut tamaasa meeqqanut inuusuttunullu annertuumik suliniuteqartartut piginnaasaqalersitsisartullu nersornissaat kissaatigaarput, Hummelip pisortaa Allan Vad Nielsen tujuuluaqqat pillugit oqarpoq.

Timersoqatigiiffiilli tamarmik tujuuluaqqani tamaniinngillat, DBU-p nittartagaani tujuuaqqamik pisiffiusinnaasumi allassimavoq.

FC Nanoq ukioq manna ukiunik 45-nngortorsiorluni nalliuttorsiorpoq, tamannalu Københavnimi Kalaallit Illuutaanni juunip 29-ani nalliuttorsiutigineqassaaq.

Timersoqatigiiffik ukiut 45-t matuma siorna IT-79-imik taaguuteqarluni ilinniartunit kalaallinik allanik arsaaqateqarusuttunit pilersinneqartoq, Kalaallit Illuutaat allappoq.  Kingorna timersoqatigiiffiup taaguutaa FC Nanoq-mut allanngortinneqarpoq.

Powered by Labrador CMS