Savalimmiut Island Games-imik aaqqissuisuussaaq
2027-mi 2029-milu Island Games qaqugu sumilu ingerlanneqassanersoq maanna aalajangerneqarpoq.
Savalimmiormiu Elin Heðinsdóttir Joensen Island Games 2027-mut aaqqissuisussatut isumaqatigiissummik atsioqataavoq. Island Gamesimi siulittaasoq Andrew Inkster uani atsioqatigaa.
Assi: Island Games
Savalimmiut 2027-mi juulip pingajuanniit qulingiluaanut Island Gamesimik aaqqissuisuussasoq Island Gamesip kattuffiata aalajangersimavaa. Taamaalillutik Savalimmiut aappassaanik aaqqissuisuussaaq. Kingullermik 1989-imi aaqqissuisuusimavoq.
2029-mi unammiuaarnerit Isle of Manimi, 1985-imi Island Games-imik aaqqissueqqaarfiusumi, juulip 14-ianniit 20-ata tungaanut ingerlanneqassapput.
Aammattaaq nunat tamalaat Island Gamesinik aaqqissuussisartut kattuffiata ataatsimiinnerani Gotland 2031-mi aaqqissuussisussatut toqqarneqarusukkumaneqassasoq aalajangerneqarpoq.
Timersortartut aappaagu Orkneymut angalassapput.
