TAAK isornartorsuisoq: Sooruna timersortarfiit aasaq naallugu matoqqasussaasut?
Nunarsuarmi aalanerpaajuniarutta, taava aasaanerani ammasariaqarpugut, taama TAAK timersortarfiit aasakkut matoqqasarnerannut isornartorsiuilluni oqariartuuteqarpoq.
- Taanna angorusutaq angussagutsigu, nunattalu iluani timersornikkut anguniakkat allat, periarfissaasinnaasunut iseriaannaasariaqarpugut, taamaasillunilu timersorneq nukitigullu aallanerit periarfissaqartinniarlugit, aamma aasaanerani.
Leiff Josefsen
Aasaaneranut ikaarsaarpugut. Piffissanngorpoq pinngortitarsuarmiinnissaq, imaatigut angallannissaq, aavarnissaq silamilu pisussanut peqataanissaq.
Tamanna peqqinnartuuvoq, timimut tarnimullu iluaqutaasussat.
Kisianni...
- Aasaanerani ilorrisimaarnitta nalaani, ukiuni makkunani eqqarsaatit ilaat apeqqusernarsivoq: Sooruna timersortarfiit aasaanerani matoqqasut?
- Ileqqorilernikuuarput “taamaattuaannarami”? Imaluunniit atugassarititaasut, sulisoqarniarneq imaluunniit allarluinnaq?
TAAK-miit apeqqut taanna qaqikkusuppaat, kaammattuillutillu ammasumik tamanna oqallisaassasoq, taamatut iliortarnerit inuiaqatigiinnut pitsaanerpaamik iluaqutaanersoq apeqquserlugu.
- Nammineerluta misillakkatta aammalu peqatigiiffiit, ilaquttallu, attavigisarnerini takutittarpaat amerlasuut, ingammik meeqqat inuusuttullu, timersortarfiit ammasut maqaasisaraat.
- Timersortarfiit timersorfiujuaannanngillat. Katersuuffiuppulli timikkut aalatitsinerni, ataatsimoorfiupput naapissimaarfiullutillu. Assammik arsarnerinnaanngilaq, kisianni aamma timersuutit allat pisoqartitsinerillu, Bjørk Lange Olsen, TAAK-imi siulersuisuni aningaaserisuusoq allappoq.
Angorusutarput angusinnaavarput?
Taassuma ilanngullugu oqaatigaa Kalaallit Nunaat aamma GIF anguniagaqartut, tamannalu TAAK-miit tamakkiisumik tapersersorlugu, tassaavorlu nunarsuarmi tamakkiisumi 2030-imi aalatitsinerpaaq.
- Taanna angorusutaq angussagutsigu, nunattalu iluani timersornikkut anguniakkat allat, periarfissaasinnaasunut iseriaannaasariaqarpugut, taamaasillunilu timersorneq nukitigullu aallanerit periarfissaqartinniarlugit, aamma aasaanerani.
Aasakkullu eqqissisimaarluta qasuersaarnitta nalaani Danmarkimi assammik arsartartut aasaanerani meeqqat inuusuttullu Danmarkimi unammiuaarnerni peqataasarput.
- Taakku piareersartarnissaminnut sungiusartarnissaannullu pisariaqartitsipput, taakkuli angujuminaapput timersortarfiit matoqqagaangata. Ineriartortitsinissatsinnut angorusutatsinnut killeqartitsipput.
- Taamaattumik una apeqqutiginiarparput: Aasaanerani matoqqatitsinerit meeqqanut, inuusuttunut inuiaqatigiinnillu pitsaanerpaamik ikiorpagut? Imaluunniit nutaamik eqqarsarnissaq piffissanngorpa? Una saqqummiussaq aallavigalugu kaammattuiniarpugut ammasumik oqallittoqassasoq, qisuariartoqassasoq immaqalu iliuuseqartoqassasoq. Ataatsimoorluta Kalaallit Nunaat aalanerulertitsigu – ukioq naallugu, Bjørk Lange Olsen, TAAK-imi siulersuisuni aningaaserisuusoq naggasiilluni allappoq.
