Timersoqatigiit Kattuffiata kattuffiit tamaasa siullerpaamik isumaqatigiissuteqarfigigai
Timersoqatigiit Kattuffianit timersoqatigiiffinnut siunnersuisarnerup tapersersuinerullu saniatigut Kalaallit Nunaata nunarsuarmi timimik 2030-mi aalatitsinerpaanngorfinngornissaanut anguniakkamut iluaqutaassasoq neriuutigineqarpoq.
KVK kattuffiit qulingiluat Timersoqatigiit kattuaffiannit isumaqatigiissusiorfigineqartut ilagaat.
Assi: Leiff Josefsen
Timersoqatigiit Kattuffiat nunami timersoqatigiiffiit kattuffii qulingiluat tamaasa suleqatigiinnissamut isumaqatigiissuteqarfigai. Kattuffiit tamarmik timersuutiminnik ineriartortitsinissaminnik immikkut periusissiamik suliaqarsimapput.
GIF tusagassiuutinut nalunaarummi allappoq.
Piginnaasanik ineriartortitsineq, kattuffinnik peqatigiiffinnillu ineriartortitsineq piujuaannartitsinissamillu ineriartortitsineq isumaqatigiissut aqqutigalugu qulakkeerinnippoq.
- Isumaqatigiissut una
anguniakkatsinnut pingaarutilimmik alloriarneruvoq. Kattuffinnik
suleqatigiinneq nukittorsarlugu, timimik aalatitsineq siammasissumik
piginnaasanillu ineriartortitsineq pitsaanerusumik ataqatigiissumillu ingerlasinnaalissapput –
innuttaasut peqqinnerusut timimillu aalatitsinerusut pilersinneqassapput, GIF-ip siulittaasuata Claus Nielsen oqarpoq.
Suleqatigiinneq GIF-ip Kalaallit Nunaat 2030-mi nunarsuarmi timimik
aalatitsinerpaanngornissaanik anguniagaanut ilaavoq.
Suleqatigiissutigineqartoq, anguniagaqarluartoq aammalu piujuartitsisoq
Isumaqatigiissut
anguniagassat ataatsimoortut, ineriartortitsinissamut pilersaarutit
suleqatigiiffigineqartut aammalu GIF-imit siunnersorneqarnissamut
tapersersorneqarnissamullu periarfissat imarai.
Isumaqatigiissut ukiuni pingasuni atuutissaaq – 2026-mit 2028-mut.
Karl Ole Petrussen Kalaallit Volleyballertartut kattuffiani (KVK) siulittaasuuvoq. Tapersersuineq Kalaallit Nunaanni timersornerup siunertaqarluartumik ataavartumillu ineriartortinneqarnissaanut pingaaruteqartoq taanna oqarpoq.
- Volleyball tassaavoq
annertuunik periarfissalik meeqqanut, inuusuttunut inersimasunullu
peqataatitsisinnaasoq. Tamatuma saniatigut ataatsimoorneq nukittorsarsinnaavaa
aammalu illoqarfinni nunaqarfinnilu sammisaqarnerulernissamut
periarfissiilluni.
- Tapersersiinikkut KVK-p
suliniutai aaqqissuulluakkamik, anguniagaqarluartumik aammalu ataavartumik
ingerlasassapput – timersorneq aammalu nunatsinni timersorneq tamakkerlugu
iluaqutissarsiffigissallugu, Karl Ole Petrussen oqarpoq.
Kattuffiit qulingiluat
isumaqatigiissummik immikkut atsioqatigiissuteqartut timersornermik
assigiinngitsunik ingerlataqarput, tamarmillu immikkut isumaqatigiissutip
ilusilersorneqarneranut peqataallutik.
Suleqatigiinneq aaqqissuussaanikkut piginnaasanik
timersornikkullu angusaqarnerulernissamut nunatsinni tamarmi iluaqutaassasoq naatsorsuutigineqarpoq.
