Triatlon nuannarisavissuarigaa

- Kuisinnermut allargartanni 38-nik ukioqartutut allassimagaluartoq qujanartumik 25-innarnik ukioqartutut misigivunga, Pilunnguaq Benjaminsen Odensemi seqinnarissuup ataani kaffisoqatigiinnitsinni qungujulluni allaarniivoq.

Triatlon naluneqanngitsutut assigiinngitsunik pingasunik timersuutaavoq : Nalunneq, sikkilerneq arpannerlu. Pilunnguaq, imaluunniit taaguutaatut Pilu, Odensemi arfininngornermi unammeqataavoq.

Odense Triatlon 2025. 950 meterinik takissusilimmut nalunneq, 48 kilometerinik sikkilerneq 10 kilometerinillu arpanneq unammissutigineqarput. Pilunnguup Ironmanimi 3,8 kilometerinik nalunneq, 180 kilometerinik sikkilerneq 42,2 kilometerinillu arpanneq (marathon) aappaagu piviusunngortissinnaassallugu neriuutigaa. Ironman tassaavoq triatlonernerit unammiuaarnerat pitsaanerpaaq.

CV pissanganartoq

Pilunnguaq timersortuaannarsimavoq. Qaqortumi inunngorpoq. Tassani aamma GU-mi ilinniarnertuunngorpoq. Qaqortumi timersortarfimmi sulorartarsimavoq assammillu arsartarsimalluni. New Zealandimi aupair, Brasiliami paarlaasseqatigiinnikkut AFS-erpoq. Portugalimiutut oqalussinnaavoq. Aarhus Kigutilerisut Ilinniarfianni kigutigissaasutut ilinniarsimasoq. Nuummi Ilisimatusarfimmi inuussutissarsiornermi aningaasaqarnermi bacheloritut ilinniagaqarpoq. Qaqortumi ukiorpassuarni isikkorissarnermik, timigissarnermut sungiusaasutut namminersortutut sulinikuuvoq. Ukiuni kingullerni pingasuni Odensemi najugaqarpoq kigutigissaasutullu sulilluni.

Seeqqumigut ajoquserneqangaatsiarnermi kingorna assammik arsartartutut timersortartuunissaraluanik ajoqusiivoq. Marloriarluni seeqqumigut pilatserujussuarnermi kingorna triatlonimik unammisarpoq, naak arpaqqissinnaanngitsutut nakorsamit nalilerneqarnikuugaluarluni. Taamaammat Kalaallit Nunaanni assammik arsarluni pissartanngorniunnermi isertitaqarnerpaasimanera eqqaamasaannaavoq nuannersoq.

- Nalunneq ilinniarniarlugu nalunaaquttap-akunnerpassui atornikuuakka. Qujanartumik maanna ajunngilaq. Crawl ilinniarniarlugu ilungersorpunga. Nuummi najugaqarallarama sapaatip-akunneranut pingasoriarlunga ullaakkut arfinernut naluttarfimmut sungiusariartarpunga. Sikkilerneq arpannerlu sungiusassallugit ajornannginnerupput. Aasakkut silami ukiukkullu issinnerani timigissartarfimmi sungiusartarpunga.

Klubbeqanngitsuuneq

- Klubbimut ilaasortaanngilanga, Pilunnguaq oqarpoq.

- Suliffiga aallaavigalugu naleqqussaanissara ajornakusoorpoq, taamaattumik unammisaqattaarnerni Triatlon Grønland klubberisattut allattarpara.

- Nunatsinneersuunera assigiinngitsorpassuartigut ersersinniartarpara. Assersuutigalugu kalaallit erfalasorput naluusinniippoq. Neriuppunga upperalugulu Kalaallit Nunaat pitsaasumik nittarsaallugulu.

- Soorunami timersuutit taakku akisuujupput. Piffissartornaannarani. Assersuutigalugu sikkilit unammissutit pitsaasut 50.000 koruunit sinnerlugit akeqarsinnaapput, taamaattumik aningaasaleeqataasinnaasumik ataatsimik marlunnilluunniit nassaarsinnaaguma iluassagaluaqaaq. Aammattaaq Island Gamesimi Kalaallit Nunaat sinnerlugu peqataasinnaaguma nuannissagaluarpoq, Pilunnguaq takorluuilluni oqarpoq.

Odense Triathlon 2025

Pilunnguaq Olsen Odense Triatlonimi peqataaffigineqarluartumi Odense Friluftsbad-imi arfininngornermi ullaap tungaani nal. 10.45 pissippoq. Imermi tungujortumik 900 meterit naloreerluni qaqipallappoq. Naluusini peeriarlugit kamiit sikkilerutit ativai sikkilinillu unammissutinik 48 kilometerit ingerlaarfigissallugit aallarluni.

Pilunnguup sikkilerneq nuannarinerpaallugu oqaatiginikuuaa.

Unammineq naggaserlugu orpippassuakkut aqqut atuarlugu 10 kilometerit arpaffigineqarput.

Nalunaaquttap-akunneri marluk minutsillu 57-it ingerlareerlunga Pilunnguaq nuannaarluni qungujulaqaluni apuuppoq.

Ullormi tassani nalunaaquttap-akunneri pingasut ataallugit apuunnissaq anguniarneqarpoq, apuuffissamilu isiginnaartut tamarmik qularutiginngilaat.

Pilunnguup anguniakkaminik timitaliinera.

Unammillernartumik aallartittoq

Pilunnguaq allarnissani sioqqullugu uippallilerpoq, igutsaap kapivaa. Qujanartumik kapitinnerminiik ajornerulerani apuuppoq.

Sikkilernermini Tour de France-mi peqataasutut misigisimalluni Pilunnguaq nalunaaquttap-akunnerini pingasungajanni unammereerluni ujameqarluni qungujulallunilu oqaluttuarpoq.

- Politiit motorcykelerujussui tununni ingerlaartut tusaaleriasaarpakka, franskillu sikkilernermik unammiuaarnerat eqqarsaatigileriasaarlugu.