POLITIIT
27-nik ukiulik tigummigallagaaqqasoq 16-inik ukiulimmut nakuuserfiginnissimasutut unnerluussaanermini pisuunnginnerarpoq
Angut 27-nik ukiulik pissutsini marlunni nakuusersimasutut unnerluutigineqarluni sapaatip-akunnerini sisamani tigummigallagassanngortinneqarpoq. Angut ilinniarnertuunngorniarfimmi atuartumut 16-inik ukiulimmut nakuuserfiginnissimasutut unnerluussaanermini pisuunnginnerarpoq.
Assiliisoq: Leiff Josefsen
Sisimiuni ilinniarnertuunngorniarfimmi atuartumut 16-inik ukiulimmut arfininngornermi novembarip aappaata unnuaani sakkortuumik saassussinermut atatillugu angut 27-nik ukiulik pasineqartoq tigusarineqarsimasoq, Kalaallit Nunaanni Politiit ilisimatitsipput.
Politikommissæri Karl Jørgen Lennert oqarpoq angut 27-nik ukiulik eqqartuussivimmi killisiorneqareerluni sapaatip-akunnerini sisamani tigummigallarneqartoq.
Angut pissutsini marlunni nakuusersimasutut unnerluutigineqarpoq, aappaanilu pisuunerarpoq, 16-inilli ukiulimmut nakuuserfiginnissimasutut unnerluussaanermini pisuunnginnerarpoq.
- Suliaq maanna misissorneqalerpoq, suliarlu naammassitinnagu apeqqutit suli akineqarsimanngitsut suli amerlaqaat, Karl Jørgen Lennert Sermitsiamut oqarpoq.
Angut 27-nik ukiulik assingusunik pinerluuteqartarsimasutut ilisimaneqartoq, taanna oqarpoq.
16-inik ukiulik saassunneqarnermini aqqunartitersimavoq Rigshospitalimullu unitsinneqarluni katsorsarneqarpoq.
