54 mio. kr.-nik taarsigassarsineq peqqinnissaqarfimmi sulisut ineqarnermut akiliutaannik appartitsissaaq
Nuummi Qatserisuni atorfimmut atatillugu inissianut attartornermut akigititanik Naalakkersuisut appartitsiniarlutik erniaqanngitsunik akilersugassartaqanngitsunillu 54 millionit koruuninik Illuunnut taarsigassarsisitsiniarput.
Nuummi inissiat nakorsat peqqissaasullu arlallit najugaqarfigiumanngilaat, ineqarnermut akiliutit qaffasippallaartut isumaqaramik.
Assiliisoq: Leiff Josefsen
Nuummi peqqinnissaqarfimmi atorfimmut atatillugu inissianik nutaanik akisuginninneq pissutigalugu nakorsat pingasunit ikinnerunngitsut suliunnaarsimasut, upernaaq manna aviisimi AG-mi allaaserineqarpoq.
Politikkeri Inatsisartunullu ilaasortaq Anna Wangenheim (D) inissiat akisuut pillugit Naalakkersuisunut arlalinnik apeqquteqarpoq, ineqarnermut akiliutit qaffasissut peqqinnissaqarfimmi nakorsanik sulisunillu allanik atorfinitsitsiniarnermi ajornartorsiutinik ajornerulersitsinissaat ernummatigigamiuk.
Inissiani akerleriissutaasuni inissianut taakkununnga erniaqanngitsumik akiligassaqanngitsumillu taarsigassarsiarineqarsinnaalersitsinikkut Nuummi Qatserisuni sanaartorneqarnikuni ineqarnermut akiliutit appartinniarneqartut, peqqissutsimut naalakkersuisup qanittukkut Anna Wangenheimimut akissutaani erserpoq.
Ukiuni 18-ini tulliuttuni taarsigassarsititsiniartut
Peqqissutsimut naalakkersuisup ataani suleqatigiissitap suliaq misissorsimavaa, Naalakkersuisullu aaqqiissutissatut siunnersuuteqarput, tassa ukiut tamaasa erniaqanngitsumik akiligassaqanngitsumillu 3,0 millionit koruuninik pisortat llluut A/S-imut katillugit ukiut 18-it taarsigassarsisitsisarnissaat, Anna Wangenheimimut akissummi tamanna atuarneqarsinnaavoq:
- Akiitsui katillugit 54 millionit koruuniussapput. Qatserisunut taamaallaat taarsigassarsititsisoqassaaq, aningaasalersuinermilu aningaasartuutit appartinneqarnerinut atorneqassaaq, tamannalu tunuliaqutigalugu Qatserisuni napasulianut pingasunut ineqarnermut akiliut naatsorsorneqassaaq.
Ineqarnermut akiliutit qanoq sunnerneqassanersut takussutissami ataani takuneqarsinnaavoq:
Sulisut aningaasarsiaat akileraarutaasussat ineqarnermut akiliutit appartinneqarnerisigut sunnerneqassanngitsut Naalakkersuisut erseqqissarpaat.
