Aalisarnermi avammut tunisat ikileriartut
Aalisarnermi avammut siorna 2023-mi tunisat anguneqassappata aalisartut ukiumi qaammatit kingulliit pingasut nalinginnaanngitsumik ulapittariaqassapput.
Assiliisoq: Leiff Josefsen
Ukioq manna qaammatini qulingiluani siullerni raajat, saarulliit, qalerallit, saattuat nipisannillu avammut tunisat nalingi 10,2 procentimik apparsimapput, tassa 2023-mi avammut tunisat nalinginut sanilliullugu 400 millionit koruunit sinnerlugit appariarlutik. Siorna piffissami tassani avammut tunisat 3.942 millionit koruuniupput.
Raajat akii unammillernartut
Raajat isertitsiffiunerpaapput, avammullu tunisat nalingi 10,9 procentimik appariarput. Raajat tunisat 5,5 procentimik appariarput, akit aamma 5,8 procentimik appariarput, tassa 2023-mut sanilliullugu avammut tunisat nalingi 223 millionit koruuninik appariarlutik.
Takussutissaq:
Naatsorsueqqissaartarfik
Qalerallillu allatut inissisimapput, taakku kiilumut akii 7,8 procentimik qaffassimapput, qalerallilli tunisat ajoraluartumik 16 procentimik ikileriarsimapput, taamaalilluni avammut tunisat nalingat siorna piffissamut tassunga sanilliullugu 9,4 procentimik appariarluni.
Saarulliit saattuallu avammut tunisat nalingi aamma apparsimapput – 11,4 procentimik aamma 14,5 procentimik. Taakkua kiilumut akii tamarmik 4,1 aamma 3,1 procentimik appariarsimapput.
Utaqqiisaagallaq naatsorsuinerit
Naatsorsueqqissaartarfiup erseqqissarpaa kisitsisit taakku utaqqiisaasumik naatsorsuinerusut, taamaattumillu paasissutissat tamakkiinerusut pigineqalerpata kingusinnerusukkut iluarsiivigineqarsinnaallutik.
Qaammatit ataasiakkaarlugit misissuataaraanni januaarimi marsimilu avammut tunisat siornamut naleqqiullugit amerleriarujussuarput.
