Air Greenland: Bilitsit ukiut tallimat matuma siornarnit suli akikinnerupput
Timmisartortitseqatigiiffiup bilitsinut akigititai 2019-imut sanilliukkaanni akikinnerusut, Air Greenland allakkatigut akissuteqarluni nassuiaavoq. Timmisartortitseqatigiiffiulli ukiumut angusanut naatsorsuutit nalilersoqqissimammagit bilitsit akii appartinneqaqqissinnaanngillat, Air Greenland ilisimatitsivoq.
Assiliisoq: Emil Nørgaard Stach
Naak bilitsit siornamut sanilliullugit akisuneruleraluartut, ukiut tallimat kingulliit eqqarsaatigigaanni suli akikinnerupput.
Qeqqata Kommuniani borgmesterip Malik Berthelsenip (S) bilitsit akiisa qaffakkiartornerat pillugu tusagassiuutinut nalunaaruteqarnerata kingorna, Air Greenland Sermitsiamut allakkatigut akissuteqarnermini taama oqarpoq.
- Akit ataasiakkaarlugit 2023-mut sanilliullugit isiginiassagaanni qaffasinnerupput, ataatsimulli isigalugit 2019-imi akinut naleqqiutissagaanni, piffissami tassani aningaasat naleerukkiartornerat eqqarsaatigalugu nalimmassarneqarsimasunut sanilliullugit appasinnerullutik, Air Greenland allappoq.
Akinik appaanissaq periarfissaanngilaq
Ukioq manna siusinnerusukkut ukiup affaanut naatsorsuutit 21,1 million koruuninik amigartooruteqartut saqqummiunneqarmata, ukiumut angusanut naatsorsuutit Air Greenlandip appartippai.
Taamaattumik bilitsit akiinik appartitsinerunissaq pilersaarutaanngilaq, Air Greenland ilisimatitsivoq.
Akit allanngorarnerat ima isikkoqarpoq:
- 2019: 100 %
- 2021: 88 %
- 2022: 77 %
- 2023: 74 %
- 2024: 85 %
2020-mi covid-19 pissutigalugu matusinerit pissutigalugit naatsorsuinerit ilaanngillat.
Orsussamut akit kisimik apeqqutaanngillat
Malik Berthelsenip tusagassiuutinut nalunaarummi bilitsit akitsoraluttuinnarnerat nassuiartariaqarnerarpaa, aammali timmisartunut orsussaq siornamut sanilliullugu akikinnerulingaarsimasoq tikkuarpaa.
Ingerlatseqatigiiffiulli aningaasaqarneranut sunniuteqarsinnaasut allarpassuusut, Air Greenlandip attaveqaqatigiinnermut immikkoortortaqarfiata erseqqissarpaa.
Ilaatigut pilersaarutit malinnagit angalasoqartariaqartillugu akunittarfinnut, unnuisitsinermut timmisartunillu attartornermut atukkanut Air Greenland aningaasartuuteqarnerusimavoq.
- Aningaasartuutit 2019-imit 2024-mut aamma qaffakkiartorput, soorlu timmisartuussinerit taamaatiinnarneqartarnerat pissutigalugu 2022-mi 100 millionit koruunit 2023-milu 80 millionit koruunit aningaasartuutaapput.
- Aammattaaq sanaartornermut aserfallatsaaliuinermullu aningaasartuutit piffissami tassani qaffassimanerat taasariaqarpoq. Pissutsit tamakku pissutigalugit Air Greenlandip akit apparteqqissinnaanngilai, tamannalu akit massakkut qanoq inissisimanerisa takutippaat, Air Greenland nassuiaassivoq.
