Anaanaga toqqissisimaffigaara, sernissortigalugu tapersersortiginerpaallugulu

20-nik ukiulik Zoe Ariella Kronvold qulingiluanik ukioqarluni anaanaminit arsaarinnissutigineqarpoq.

Nukaanut suli inunngunngitsumut ullualuit qaangiuppata aamma taama pisoqassaaq.

Thisted Kommunimmi aalajangiinera aallaavigalugu Keira Alexandra Kronvold anaanatut tulluanngilaq. Zoemulli piviusoq allarluinnaavoq.

– Isumaqarpunga anaanama pineqarnera naapertuilluanngitsoq inuppalaarnanilu. Kommunip anaanaga malersortuarpaa, naak angajoqqaarsianut inissiffigineqartunit pitsaanerusumik isumagilluarnerusinnaagaatigut. Nukara illersorusuppara, taamaaliorsinnaanngilangali. Inunngorpat kommunip arsaarinnissutigissavaa. Erninermut peqataaniarlunga aalajangerpunga. Tamanna angajutut anniaat misigisariaqarpara. Aamma anaanama assaa tigummerusuppara. Anaanaga ullut tamaasa sapinngisaminik pisarpoq. Paasilluarnerujartortillugu siunissara ernumagineruleraluttuinnarpara. Danmarkimi isumaginninnikkut aaqqissuussinerup ajorluinnartumik pivaatigut, tamannalu eqqunngitsuusoq takusinnaanngilaalluunniit. Sooq meeqqat kalaallinik angajoqqaallit pinngitsaalillugit aarsaarinnissutigineqassappat? Ilaquttatsinniiginnarsinnaasariaqarpugut.

Meeraanermi eqqaamasat

Meeraanert siusinnerusoq qanoq eqqaamasaqarfigaajuk?

- Anaanama paninnguarivaanga. Meeraallunga kjuulinik 88-inik peqarpunga. Taakku amerlanersaat anaanama ikinngutaanit tunissutisiaraakka. Aqqaluaralu nuannaartuuvugut, pisariaqartitavullu tamaasa anaanama uagutsinnut tunniuttarpai. Aqqaluara asanninnermik tuniorarneqartaqaaq eqitaarneqartaqalunilu, nuunooqqatut allatut qianeq ajorpoq.

– Aappaluartoq, taskit kamippaallu nuannarisaqaakka. Isiginnaagassiat Barbiet prinsesset, dinosaurit qungussutarianngnuarnullu tunngasut nuannarisaqaakka. Isiginnaagassiat taakkua ima uteqattaartartigaakka ataatama alanngaarsinnaalerlugit allaat suut pillugit filmiliarineqarnersut eqqaamasinnaallugit. Qaammammut ataasiarluta anaanagalu illoqarfimmut neriartortarpugut — marluinnaalluta. Unnuaannaq iteraangama anaanaga ornittarpara. Ajorineq ajorpaa. Ullaakkut eqitaarneqartarpunga, nerisassanik tunineqartarlunga anaanamalu nutsakka iluarsaattarpai atisamalu eqqiluitsuunissaat isumagisarlugit. 

- Inersimasunik uagutsinnukartoqartoq eqqaamavara. Sooq nereqataallutillu pisuttuaqataassanersut paasiuminaatsippara. Anaanaga qanoq iliussanersoq piumasaqarfigaat. Anaanagalu piumasaqaateqarfigineqaleraluttuinnarluni. Takusinnaavara annilaangasoq, naak qungujulaffigigaluarai.

Allanngortoqarnera

Qulingiluanik ukioqarlutik angerlarsimaffinniit arsaarinnissutigineqarnerit qanoq misigisaqarfigaajuk?

- Atuartunga inersimasut aavaannga. Paasiuminaatsippara. Ilaqutariiaqqanut pivugut, eqqaamavaralu anaanaga utaqqillugu. Aqqalussama ilagaanga. Saammarsarpara. Ersivugut. Aqqaluara qiavoq anaanarpullu ujarlugu.

- Anaanaga sooq agginnginnersoq paasisinnaanngilara. Nuunneqaqqikkattali paasiartulerpara susoqarnersoq. Aqqaluara uanniit qimagutsinneqarpoq. Sinittarfimmi kisimiillunga sinittalerpunga. Inersimasoq isertarpoq aperiartorlunga qanoq innersunga, arlaleriarlungalu akisarpara anaanaga maqaasillugu angerlarusullungalu. Qanorluunniit qiagaluallaruma kinguneqarneq ajorpoq. Iluaqutaanngilaq. Angajoqqaarsiassannukartinnanga aqqaluara takuara. - Anaanaga takoqqikkakku sivisuumik eqitaarpaanga, paasinngitsuungajappara taannaasoq. Ataataga aamma ilaavoq. Sivikitsuinnarmi takuakka, kingorna sivisuumik takoqqinnagit. Sakkortuvoq.

Angajoqqaarsiat 

Zoe Ariella Kronvold Sundbymi angajoqqaarsiaqalerpoq, taakkunanilu kiserliortutut, soqutaanngitsutut kukkusutullu misigisimalluni.

- Angajoqqaarsiani najugaqarninni tusaasuusisalerpunga. Paasitinniaraluarpakka oqarfigiinnarpaanngali filminik isiginnaarpallaarnerarlunga. Ikiorniarsarinngilaannga kommunilu aamma paasitinnagu. Ataasiarluni unnuami taama pisoqarmat ersilerama angajoqqaarsiama siniffiannut nuunniaraluarpunga, ininnukaqqullungali oqarfigiinnarpaannga. Kommunimit angajoqqaarsianniillu sivisuumik artorsartitaareerlunga imminut toqungajalluinnarpunga. Anaanamali kisimiilluni ilissagaanga takorluulerakku unippunga.

- Aamma – susoqaraluarpalluunniit – anaanannut kipisanera takuteqqusaanngilluinnarpara. Misigissutsinik takutitseqqusaanngilanga, taamaaliorniaraangamalu qimmeq oqaluuteqquinnartarpaat. Aamma kalaallisut oqaloqqusaanngilanga Kalaallit Nunaanneersunillu takusaqaqqusaananga. Aatagaluunniit Danmarkimukarmat takoqquneqanngilaq. Sapissagiga sullissisuma nalilersimammagu. - Angajoqqaarsiama soqutiginngilluinnaraannga paaseriasaarpara, aningaasat piinnarlugit paarsarigaannga. Ullumi anaanama ataatamalu ilaginerini akuersaarnerusarput isumassuinerullutillu. 

Ulloq unnuarlu paaqqinnittarfiit 

Ullut ilaanni Zoep arni tusaasuusisarnini angajoqqaarsiaminiillu qanoq pineqartarnini pillugit oqaluttuuppaa. - Kommunimut allagaqaqqullunga sivisuumik piumaffigisaqattaarpaanga. Angajoqqaarsianni toqqissisimannginnera pillugu allappunga, anaanannullu angerlaqqikkusullunga. Sullissisoq orniguppoq kisimiitsillungalu oqaloqatigerusullunga, kingornalu angajoqqaarsiakka oqaloqatigalugit. Isumaqarpunga ikiorniaraanga. Angajoqqaarsiakkali oqaluttuuppai qanoq oqarsimanersunga, taakkualu kamaattorujussuanngorpaannga. Taamatut pisoqareernerata kingorna angajoqqaarsiakka, sullissisoralu tarnillu pissusaanik ilisimasalik oqaluukkumajunnaarpakka.

- Anaanama uannik sorsuutiginninnini unitsinngisaannarpaa. Ikiorniarsarisarpaanga illersorniarsaralungalu. Ataatagalu uannut sapiitsuliortutullu ippoq. Pakatsisinngisaannarpaanga neriorsuutinilu eqquutsittuaannarlugit.

Zoe angajoqqaarsiaminiit Sundbymi ulloq unnuarlu paaqqinniffimmut kingorna nuutsinneqareerami iluaallappoq. Malugisinnaavaali sulisut anaanani Kalaallit Nunaallu nuannarinngikkaat.

Suliaq pillugu allagaatit 

Zoe Arialla Kronvoldip oqaatsini sullissisumi allatut isumaqartilertarai malugisarpaa, sullinneqarnerminiillu allagaatit maanna atuaraangamigit allaaserineqartut ilisarisinnaanngilai. - Assersuutigiinnarlugu tarnip pissusianik ilisimasallip misissuinerani allassimavoq anaananniit asanninnermik tunineqartarninnik eqqaamasaqanngitsunga. Taassuma pisut assigiinngitsut oqaluttuareqqoriarlugit anaanama asanngikkaanga allattarsimavaa. Ilumuunngilaq. Anaanama asavaanga. Suliaq pillugu allagaatini sallu initoorujussuuvoq.

Angerlarsimaffiup avataanut inissinneqaqqanermi nalaani anaanaminut angerlarusulluni kommunimut arlaleriarluni allagaqartarsimalluni Zoe Ariella Kronvoldip oqaluttuaraa. 

- Killormuanilli takusarnigut akuttoraluttuinnarput. Anaanaga najorusunnginnakku qiasarnerarlunga inerniliutigineqarpoq. Anaanannulliuna angerlarusukkama qiasartunga. Anaanaga, ataataga aqqaluaralu maqaasigakkit. Anaananniitillunga anaanaga aamma qiaqqusaanngilaq, ilaannili sakkortuallaaleraangat kisimiileraangatta suut misigisarnerlugit oqaluttuuttarpara. Sapinngisani tamaat atorlugu saammartinniartarpaanga. Allannginnami qanera nipittartumik nipitinneqarsimasoq paffequserneqarsimallungalu. Kommunip angajoqqaarsiamalu peqqusineri maliinnartariaqartarpakka. Ukiuni qulingiluani angerlarsimaffiup avataanut inissinneqaqqaninni saammarsaatituara tassaavoq anaanama asanninnera, tapersersuinera, qanilaarnera saammarsaasarneralu. Ilaginnanngisaannarpaanga.

Naammaginanngisaannartoq 

Angerlarsimaffiup avataanut ukiuni taakkunani inissinneqarsimaninni suut annaavigit? 

- Amerlaqaat. Meeraanera uterteqqissinnaanngisara annaavara. Anaanama najornissaralua annaavara. Aqqalunnut atassuteqarnera aamma annaavara. Oqaatsikka kultureralu annaavakka. Kalaallit kulturiat nuannareqaara. Juulli, poorski, seqerngup nueqqaarfia, ilaqutariit ataatsimuualaartarnerat Kalaallit Nunaanneersullu oqaluttuatoqqat. Kalaallisuut, aamma soorunami kalaalimerngit. Kinaassusera annaavara. Qallunaajusussanngorlunga perorsagaavunga. Uummatinnut tulluanngitsoq. Suusinnaanera paatsiveerusimaarutigaara, imaluunniit qallunaanngornissannik naammannerlunga. Illoqarfimmiikkaangama ikinngutikkaluunniit ilagigaangakkit nalilersorniarneqartarpunga. Naammanngisaannarpugut. Nutsakka sungaartuunngillat, arnisaatinnik qernaaripput. Uummatima ilaa tammartajaaqqavoq imaqaranilu. Imminut nassaariniaqqinnissannik ikiorneqartariaqarpunga.

- Kommuni angajoqqaarsiakkalu iliuuserisimasatik pillugit uannut anaanannulluunniit utoqqatsersimanngisaannarput. Maannalu aamma taamaalioqqillutik ... nukkannut, Zoe Ariella Kronvold oqarpoq. 

Zoe Ariella Kronvoldip taassumalu arnaa Keira Alexandra Kronvoldip apersorneqarneri taakkununngalu suliat tunngasut allagaatit aallaavigalugit allaaserisaq suliarineqarpoq. Angajoqqaarsiaasimasut kommunilu isornartorsiuinerit pillugit oqaaseqartinnissaat iluatsinngilaq.