Ane Hansen Inatsisartunut qinigassanngortippoq

Kommune Qeqertalimmi borgmesteri, Ane Hansen (IA), 1. april 2025-mi kommunalbestyrelsemut qinersinermi qinigassat ilagissanngilaat.

Ane Hansen 2024-mi ukiup naalernerani aalajangersimavoq  kommunalbestyrelsimut qinigassangorteqqinniarnani.

Taamaalilluni Ane Hansen 1989-mili kommunalbestyrelsimi qinikkatut sulinerminit tunuartussanng0rpoq. 2009-miit 2013-mut naalakkersuisuni ilaasortaasimanera eqqaassanngikkaanni ukiut 20-it sinnerlugit kommunalbestyrelsimeereerluni, qinigaaffinnilu arlalissuarni borgmesteroreerluni, nukinnut nutaanut aquut tunniutissallugu piffissanngornerarpaa.

Inatsisartunut sassaqataanissaminut angerpoq

Ane Hansen kajumissaarneqarsimavoq Inatsisartunut sassaqqullugu, tamannalu eqqarsaatigereerlugu aammalu nukinnut nutaanut bormesteriunini tunniukkusoreeramiuk, sassaqquneqarnerminik akuersinissani siunniuffigaa:

- Piffissanngorsorigakku nutarternissamut aamma kinguariit tulliit inissaqartinneqarluaqqullugit. Maannali nunarsuarmi Naalakkersuinikkut pissutsit sukkaqisumik allangoriartortut nalaatagut pillugit kaammattorneqarluarama Inatsisartunut qinigassangorteqataaniarlunga akuersisimavunga suleqataarusukkama nunatsinni nunap inuisa pisinnaatitaaffimmikkut salliutinneqartuarnissaannut qulakkerinnittunut suleqataanissamut, Ane Hansen politikeritut FB-mi quppernermini allappoq.

Innuttaasunut naleqqunnerusumik aaqqissuusserusuppoq

Ane Hansen Sermitsiamit aperaarput Inatsisartuni suliarerusutaminik pingaarnerutitaqarnersoq:

- Kommunit aaqqissuussaanerisa nutarteriffigineqarnissaanni, kommunit kattutinngikkallarmata qanimut oqartussaaqatigiissimaneq assorsuarlu massakkut maqaasineqartoq uterfigineqartariaqarpoq. Assersuutigiinnarlugu kommunit kattutsinneqanngikkallarmata nunaqarfiit kommunalbestyrelsini peqataanerujussuunikuupput oqartussaaqataallutillu.

- Nunatsinni siammasissumik najugaqarnerput nukittoqqutigalugu oqaatigiinnarsinnaanngilarput tulluusimaarutigalugulu, tassami timitalimmik siunnerfilimmillu oqartussaaqatigiinneq ingerlanneqartariaqarpoq, innuttaasullu naligiinnerusumik atugassaqartitaasariaqarput, sumi najugaqarneq apeqqutaanani.

Eqiterussigaluttuinnarneq illuatungilerusuppaa

Ane Hansen naapertorlugu kommunit kattussuunneqarsimanerisa malitsigisaasa ilagaat sulisoqarnikkut illoqarfinnut anginernut eqiterussineq annertooq ingerlanneqarsimasoq:

- Assersuutigiinnarlugu isumaginninnermut aqutsisoqarfimmi isumaginninnermut siunnersortit allallu isumaginninnerup iluani qaffasissumik ilinniarsimasut eqiterneqaleraluttuinnarput annertuumillu allaffissortinneqarlutik. Illuatungaani kommunit innuttaasunut isumaginninnikkut sullissisussanik amigaateqartorujussuusut. Aaqqissuussisariaqarpugut innuttaasut sullinneqarnissaat salliutillugu, taamaammat pisortat suliassanik agguataarisarnerat politikkikkut annertuumik eqqumaffigisassavoq, Ane Hansen ooqarpoq.

Inatsisiliornerup pitsaassusaa qaffassagassaavoq

Taamatuttaaq Ane Hansen isumaqarpoq inatsisiliornerni eqqumaffigilluinnagassaasoq inatsisit innuttaasunut kommuninullu qanoq kinguneqarsinnaassanersut qaffasissumik pitsaassusilimmik nalilersorneqartarnissaat tamatigut isumagineqartariaqartoq:

- Inatsisiliortutut mianerilluinnagassaq tassaavoq issariarnerinnarmi isumassarsillunilu ullormiit ullormut allanngortiterisoqaannarsinnaanngimmat kingunissaasut qulaajarluaqqaarnagit. Taamaammat Inatsisartuni sulissutigerusutama pingaarnerit ilagaat inuiaqatigiit inatsisiliornikkut sullinneqarneranni innuttaasunut kommuninullu kingunissaasut nalilersorluarneqartassasut, Ane Hansen (IA) oqarpoq.

Qinigaaffiit arlallit ataatsikkut ingerlanneqartarnerat akerlerivaa

Ane Hansenip borgmesteritut sulineq nukinnut nutaanut tunniunnissaanut piareersimanerarmat, aperaarput paarlatsissaanik sassartitsinissaminik partii piareersagaqarnersoq:

- Aap, kisianni inuttaasa namminneq tamanna nalunaarutigissavaat, taamaattumik matumani aternik taagugaqassanngilanga. 

Illimmi borgmesteritut tunuartussanngoraluarlutik kommunalbestyrelsimut sassassamaarpit?

- Naamik, kommunalbestyrelsi iperartussanngorpara, maannalu Inatsisartunut sassaqataanissannut akuersinikuugama taanna tamakkiisumik aallutissavara, tassa  arlariinnik ataatsikkut qinikkatut inissisimasarneq sanngiillisaataasutut nalilerlugu akerlerlerilernikuugakku, taamaammat kommunalbestyrelsimut sassassanngilanga, Ane Hansen naggataatigut oqarpoq.