Taxamik ingerlatitsisoq aalakoorluni biilersimasutut tigusarineqartoq— umiatsiami motoorimik unittoortut annanneqartut

Imigassartorsimalluni biilertoqarsinnaasoq, Kalaallit Nunaanni Politiit Sapaammi ullaap tungaani nal. 09.45 nalunaarfigineqarput.

Taxanik ingerlatitsisup aalakoorluni ingerlasimasinnaanera nalunaarutigineqartoq, pigaartut pisortaat Aputsiaq Hansen oqarpoq.

Politiit taxanik ingerlatsisoq Nuup ilaani Nuussuarmi unitsippaat, pasineqartorlu supusilluni aalakoornartunut uuttortaammi akuerisaq sinnerlugu aalakoortoq paasineqarpoq.

Ingerlatsisoq ileqquusoq malillugu, aalakoornartumik sunnertissimasutut biilinik ingerlatsisutut tigusarineqarpoq, aavanilu qanoq aalakoornartoqartiginersoq paasiniarlugu aaversilluni.

Aputsiaq Hansenip erseqqissarpaa aalakoorluni biilerneq biilertumut, ilaasunut pisuinnarnullu navianartuusoq.

Qaqortumi imigassamut attuumassutilimmik pisoqartoq

Politiit Qaqortumi imigassamik aalakoornartulinnik tuniniaanerup inerteqquteqartoqarallarnerani imigassartortoqarsimaneranik nalunaarummik nalinginnaanngitsumillu sapaammi kingusinnerusukkut nalunaaqutaq 12.04 tigusaqarput.

Illoqarfimmi najugaqarfimmi eqqissiviilliortoqarmat politiit ornigupput. Inuit marluk anisitaapput, politiillu eqqissisaassut, pigaartut pisortaat oqaluttuarpoq.

Imaani SAR-imik annaassiniarneq

Politiit imaani ujaasinermik annaassiniarnermillu sapaammi unnukkut nalunaaqutaq 18.39 aallartitsipput.

Umiatsiaq Nuup tungaanut ingerlasoq motooriminik unittoormat politiit angallataat umiatsiap sumiiffianut aallartinneqarpoq.

Aputsiaq Hansen oqaluttuarpoq inuit sisamat umiatsiamiittut politiit angallataanik Nuummut aallarunneqartut.

Umiatsiaq motooriminik ajoquteqarmat sumiiffimmut qimanneqarpoq.