Takussutissiaq: Kujataa meeqqallu atuarfiat -Aningaasanut inatsisissap oqaluuserineqarnissaa kinguartinneqarpoq

Inatsisartut sapaatip-akunnerani 44-mi ullormi ataasiinnarmi ataatsimiissapput – marlunngornermi. Ataasinngornermi ataatsimiittoqartussaagaluarpoq, maannali ullormut oqaluuserisassat nalunaarsorsimaffiannit peerneqarsimavoq.

Suulli oqaluuserissavaat? Oqaluuserisassaagallartut Sermitsiamit atuarlugillu siunnersuutit tigulaariffigaagut.

Aningaasanut inatsit

ATUARUK AAMMA

Naalakkersuisut ukioq manna aningaasatigut inatsisissatut siunnersuummi Landskarsimut 89 millionit koruuninik amigartooruteqarnissaq naatsorsuutigaat

Ataasinngornermi oktobarip 26-anni oqaluuserisassaq ataasiinnaavoq: 2027-mut Aningaasanut Inatsisissatut Siunnersuut.

Oqaluuserisassaq taanna maanna kinguartinneqarpoq. Aningaasanut inatsisissatut siunnersuut ataatsimiinnermi allami aappassaaneerneqassasoq Inatsisartut nittartagaanni allassimavoq.

Nunatta karsia aappaagu ingerlatsinermut, sanaartornermut taarsigassarsisitsinernullu 89 millionit koruuninik amigartooruteqassasoq Naalakkersuisut missingersuutigaat. Tamannali ukiap ingerlanerani inatsisissatut siunnersuutip Inatsisartuni suliarineqarnerani isumaqatigiinniarnernilu allanngorsinnaavoq.

Aningaasaqarnermut naalakkersuisup Aqqaluaq B. Egedep (IA) aningaasanut inatsisissatut siunnersuut septembarip 20-ani saqqummiummagu Ilulissani atuarfimmut nutaamut 20 millionit koruunit immikkoortinneqassasut, innarluutillit suliniuteqarnerulernissaat aamma Qaqortumi mittarfik naammassineqarnissaanut Naalakkersuisut 250 millionit koruuninik aningaasaliissasut ilaatigut atuarneqarsinnaavoq.

Aningaasanut inatsisissatut siunnersuut siullermeerneqareerluni Inatsisartut Aningaasaqarnermut Akileraartarnermullu Ataatsimiititaliaannut ingerlateqqinneqarpoq. Isumaliutissiissummik ataatsimiititaliamit suli tunniussisoqanngilaq.

Kujataa

Kujataa pillugu siunnersuutit marluk marlunngornermi oktobarip 27-ani aappassaaneerneqassapput. Siunnersuuteqartut tassaapput Nivi Rosing (IA) aamma Hans-Erik Enoksen (D).

Aatsitassarsiornerup takornariaqarnerullu ineriartortinneqarnissaannut atatillugu Nanortalik nunaqarfiilu qanoq pitsaanerpaamik ineriartornissamut, suliffissaqarnerulernissamut inuussutissarsiornermillu ineriartortitsinissamut piareersarneqarsinnaanersut Hans-Erik Enoksenip paaserusuppaa.

Nivi Rosingip Kujataani inuussutissarsiornerup ineriartortinnissaa aalisarnerlu sammivai, Naalakkersuisullu soqutigisaqaqatigiinnik peqataaffigineqartunik suleqatigiissitaliussasut, taakkualu Kujataani inuussutissarsiornerup ineriartortinneqarnissaanut aalisarnerullu qanoq nukittorsarneqarsinnaaneranut inassuteqaatinik suliaqassasut siunnersuutigaa.

Naalakkersuisut ima allannguutissatut siunnersuuteqarput: ”Naalakkersuisut Kommune Kujalleq suleqatigalugu susassaqartullu peqataatillugit suleqatigiissitaliornissaat piumasarineqarpoq, tassani Kujataa aatsitassarsiornerup, aalisarnerup takornariaqarnerullu iluani periarfissat eqqarsaatigalugit ineriartornissamut, suliffissanik inuussutissarsiornermillu ineriartortitsinissamut qanoq pitsaanerpaamik piareersarneqarsinnaanersoq sammineqassapput."

Inuussutissarsiornermut Aatsitassanullu Ataatsimiititaliap isumaqatigiilluni allannguutissatut siunnersuutit taakku marluk akuerineqarnissaat innersuussutigaa.

Meeqqat atuarfiat

Ataatsimiinnermi matumani meeqqat atuarfiannut allannguutitut siunnersuutit sisamat ilaat tassaavoq Kuno Fenckerip (N) ukiup atuarfiusup Kalaallit Nunaanni kulturikkut inuiaqatigiillu atugaannut naleqqussarnissaanik kissaataa.

AAMMA ATUARUK

Naleqqap piniarfiup nalaani aasaanerani qaammatini pingasuni atuanngiffeqartoqartarnissaa siunnersuutigaa

Taanna marlunngornermi oktobarip 27-anni aappassaaneerneqassaaq.

Naleqqap aasaanerani atuanngiffeqarnerup juunip aallaqqaataaniit aggustip 31-anut aalajangersimasumik atuutsinneqarnissaa kiisalu apriilimi maajimilu sapaatip akunnerani atuartitsinerup ullunut sisamanut ikilisarnissaanut periarfissaqartitsinissaq piumasaraa.

Siunnersuummi meeqqat inuusuttullu ilaqutariittut piniarnermik, aalisarnermik pilersuinermillu suliaqarnermut peqataasinnaalissapput, tamannalu atuarfiup kulturikkut ineriartortitsinertut ingerlateqqitassaatut isigineqassaaq.

Naalakkersuisut siullermeerinninnermi allannguutissatut siunnersuuteqarput, tassanilu suleqatigiissitap pilersinneqareersup kalaallit kulturiannut inuiaqatigiinnullu tunngatillugu pissutsit eqqarsaatigalugit ukiup atuarfiusup aaqqissuussaanerata eqaannerusumik aaqqissuunneqarsinnaanera aamma misissussagaa siunnersuutigineqarpoq.

Kuno Fenckerip siunnersuutaa Kulturimut, Ilinniartitaanermut, Ilisimatusarnermut Ilageeqarnermullu Ataatsimiititaliamut ingerlateqqinneqarpoq, aappassaaneerneqartinnagulu ataatsimiititaliaq isumaliutissiissummik nassiussivoq, tassani ataatsimiititaliap isumaqatigiittup Naalakkersuisut allannguutissatut siunnersuutaat akuerissallugu innersuussutigigaa allassimavoq.