Saviminilerinermik ilinniarfimmik aningaasaliisoqarnissaanut Borgmesteri ujartuivoq

Saviminilerinermik Ilinniarfik Sisimiuni ataatsimut kattunneqassasoq, Naalakkersuisut aalajangerput. Sanaartornissamulli missingersuutinut suli aningaasanik nassaartoqanngilaq. Tamanna ilinniartitaanermut naalakkersuisup Nivi Olsenip Sermitsiamut akissutaani atuarneqarsinnaavoq.

"Paasissutissiissutigineqassaaq pilersaarusiornissamut neqerooruteqarnermullu, siunnersortitut sullissinerit ilanngullugit, aningaasaliissuteqartoqarlunilu akuersissummik maannakkut tunniussisoqarsimalereermat. Tamanna alloriarneruvoq pingaarutilik siulleq, suliniummut tunngavissamik sukumiisumik qulakkeerinnittussaq ingerlatseqqinnissamullu aalajangiinissamut tunngavissaalluartumik qulakkeerinnittussaq. Naalakkersuisut sanaartornermut suliniutinut angisuunut periuseq atuuttoq malippaat, tassani siullermik pilersaarusiortoqarlunilu, neqerooruteqarnissamut aggersaasoqartarpoq, tamatumalu kingorna sanaartornermut missingersuutit, niuernermi akigitinneqartut aallaavigalugit aalajangerneqartarlutik. Neqeroortitsinerup inernera saqqummiunneqareerpat Naalakkersuisut Inatsisartuni oqaloqatigiillutik suliniutit piviusunngortinneqarnissaannut aningaasalersorneqarnissaannullu isummerumaarput."

EU-mik Danmarkimilluunniit isumaqatiginninniarnerit

Qeqqata Kommuniani borgmesterip Malik Berthelsenip Nivi Olsenip akissutaa ernummatigaa, taassuma neriuutigigaluarpaa sanaartornerup aningaasalersorneqarnissaa qulakkeerniarlugu Naalakkersuisut iliuuseqarnerusimasinnaagaluartut.

– Siullermik iluarisimaarpara Sisimiuni nutaamik Saviminilerinermik Ilinniarfissap pilersinneqarnissaa pingaarutilerujussuartut Naalakkersuisut isigimmassuk, aammalu aningaasaliissutaareersut atorlugit pilersaarusiorneqarnera (projektering) ingerlanneqarmat. Taamaakkaluartoq isertuutissanngilara sanaartorneqarnissaa ilumut piviusunngortinneqassanersoq ernumagigakku. Tassami Naalakkersuisup akissutaani maluginiarparara sanaartorneqarnissaa suli qulakkeerneqarsimanngitsoq aammalu tamanna kingusinnerusukkut aatsaat Inatsisiartut peqatigalugit isummerfigineqarniartoq. Malik Berthelsen oqarpoq, taassuma neriuutigaa Naalakkersuisut ataatsimut nalunaarutit aningaasaliissutillu kingulliit tunngavigalugit sanaartornerup aningaasalersorneqarnissaa pillugu Danmark imaluunniit EU isumaqatiginninniarfigalugu.

– Sisimiuni nutaamik Saviminilerinermik Ilinniarfissaq Naalakkersuisut ilumut pimoorukkunikku, isumqarpunga sanaartorneqarnissaanut aningaasat ilanngullugit ilungersuutigisariaqaraluaraat. Tamannami Qeqqata kommuniata siunissaanut ineriartornissaanullu pingaarutilerujussuuvoq, Malik Berthelsen oqarpoq.

Aningaasaqarnikkut akisussaassuseqarneq tunngavigalugu

Nivi Olsen Sermitsiamut ilisimatitsivoq Naalakkersuisut inuussutissarsiornermut tunngasunik ilinniagaqarnerup nukittorsarnissaanut siunissamilu nunatsinni sulisussanik ilinniarsimasunik ineriartortitsinissamut atatillugu Sisimiuni Saviminilerinermik Ilinniarfiup nutaap pilersinnissaa pingaartikkaat.

Aamma ilanngullugu allappoq Naalakkersuisut suliniut aningaasatigut akisussaassuseqarluni ingerlanneqarnissaat qulakkeerusukkaat, tamatumalu peqatigisaanik saffiugassanik ilinniarfiup iluani ilinniartitaanermut piginnaanngorsaanermullu pitsaanerpaamik sinaakkutissaqalernissaq.

Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.