Aqqalu Reimer borgmesterinnguinnarniarpoq
Borgmesterinngornissaminit ullut marluk matuma siornatigut tunuarpoq. Kommune Qeqertalimmi Siumut sinnerlugu qinigassanngortittuni taaguunneqarnerpaaq borgmesteritut sulinissaminut piareeqqippoq.
Aqqalu Reimer borgmesterinngornissaminit tunuarmat Frantz Lundblad borgmesterinngornissaminut piareeraluarpoq. Aqqalu Reimerili naapertorlugu taanna borgmesterinngortinneqassasoq aalajangersimapput.
Assi: Leiff Josefsen
Kommune Qeqertalimmi politikkikkut pissaaneqarniuuttoqarpasippoq. Borgmesteritut atuuffik Aqqalu Reimerip Frantz Lundbladillu tamarmik Siumut sinnerlugu qinikkat atuuffigerusuppaat.
Siumut kommunalbestyrelsemi arfinilinnik qinigaatitaqarpoq. Taakku Naleqqamik Atassummillu suleqatigilernermigut kommunalbestyrelsimi arfineq-pingasunik ilaasortanik taperserneqarlutik borgmesterinngortitsinissartik qulakkeerpaat.
Kinaliuna borgmesterinngorniartoq?
Aqqalu Reimeriulerpasippoq. Taanna borgmesterinnguinnassalluni Facebookimi quppernermini ippassaq allappoq.
Aalisarnermik piniarnermillu inuussuteqaqqilerniartoq - massakkorpiaanngitsorli
Aqqalu Reimer Qeqertalimmi Siumut sinnerlugu qineqqusaartuni 131-nit taaneqarluni taaguunneqarnerpaavoq, taamaalilluni borgmesterinngornissaa ilimanaateqarluni.
Politikimulli aatsaat appakaannini pissutigalugu sapaatip-akunnerata aallartinnerani borgmesterinngornissaminit Frantz Lundblad borgmesterinngortitussanngortippaa. Taanna kommunimi Siumut sinnerlugu qinigassanngortittuni 124-nik taaguunneqarluni qinerneqarnerpaamut tulliuvoq – tassa Aqqalu Reimerimit arfineq-marlunnik ikinnerusunik qinerneqarnikuulluni.
Aqqalu Reimer piniartutut aalisartutullu inuussutissarsiutini unitsiinnarsinnaanagu tunngavilersuutigaa.
Maannakkulli isumaa allanngorsimavoq.
Aalisartutut piniartutullu inuussutissarsiutini qimaajunnanngimmat borgmesteritut kaammatorneqarluarami borgmesterinnguinnassalluni Facebookimi allappoq.
Partiip iluani unammisoqanngitsoq
Borgmesterinngortitsiniarnermi Siumup iluani pissaaneqarniuuttoqarsorigaanni Siumup Qeqertalimmi gruppiata pingasunngornermi tusagassiuutinut nalunaarummi taamaattoqanngitsoq paasissutissiissutigaa.
- Erseqqissarusupparput Siumup gruppiata iluani kina borgmesterinngussanersoq pillugu assigisaatigulluunniit salliuniartoqarnikuunngimmat. Qinersinerup inernera tunngavigeqqissaarlugu sulisimavugut. Sulinerput tamatigut isumaqatigiinnikkut ingerlanneqarsimasoq naqissuserusupparput, Qinersinerup inernera aallaavigalugu sulinerput nangissavarput, Aqqa Samuelsen Siumup gruppia sinnerlugit allappoq.
Apriilip aallaqqaataani qinerneqarnerpaartartit borgmesterinngortussatut ataatimoorullugu toqqarsimagitsik taakku allapput.
Kommunalbestyrelsip nutaap inissitsiterluni ataatsimiinnerani kina borgmesterinngussanersoq aatsaat qulakkeerneqassaaq.
