Aqquserngit taaguutaat ajornartorsiutaasut Ingerlatsiviup atorunnaarsinniarpai
Nuummi aqquserngup aqqa atorneqarunnaassaaq allanillu taaguuteqalissalluni, Sanarfinermut Avatangiisinullu Ingerlatsivik taama siunnersuuteqarpoq.
Illustration: Kommuneqarfik Sermersooq
Aqqit assigiingajaat Saqqarliit aamma Saqqarlernut paatsiveerutsitsisarput, tamannalu qatserutinut allakkerisunullu kukkunernik kinguneqartitsisarpoq.
Assiliisoq: Kommuneqarfik Sermersooq
Tamanna tunngavigalugu Kommuneqarfik Sermersuumi Sanarfinermut Avatangiisinullu Ingerlatsivik maanna politikkerinut siunnersuuteqarpoq aqquserngit ataatsimut kattunneqassasut, aqqusernillu aappaata taaguutaa peerneqassasoq, taamaalilluni aqqusineq tamarmi Saqqarliit-mik taaguuteqalissalluni.
Iliveqarfimmut aqqutit
Aammattaaq aqquserngit pingasut iliveqarfimmut aqqutaasut taaguuserneqarnissaat politikkerinit aalajangiiffigineqassapput. Ingerlatsivimmi pisortap Søren Pedersenip innersuussutaani ima allassimavoq:
- Ukiumi iliveqarfiup tungaanut aqquserngup qulleqannginnera isumannaallisaanertigut aarlerinartumik aamma toqqissisimannginnermik pilersitsivoq. Aqqusineq taaguuserneqarsimanngippat Nukissiorfiit aqqusinermi qullilersuisinnaanngillat, allassimavoq.
Taamaattumik aqqit pingaarnersiorlugit Ingerlatsivimmit politikerinut toqqarneqartussatut siunnersuutigineqarput:
- Ikaarfik
- Naaffia
- Eqqissivik
Aammattaaq Mannguap eqqaani sanaartorfimmi nutaami aqqusineq nutaaq Qoorua-mik taaguuserneqassasoq oqaatsit uku tunngavigalugit inassuteqaataavoq:
Itersalik
- Qaqqajunnat marluk akornanni aqqusineq appakaaffik itersartaqarpoq "Qoorua"-nik kalaallisut taaguutilimmik. Aqqa naleqquppoq najukkamilu inuiaqatigiit kinaassusaannut patajaallisaalluni.
Illoqarfinnik ineriartortitsinermut sanaartornermullu ataatsimiititaliaq, aternik inassuteqaatinik aalajangiisussaq, aggustip arfineq-pingajuanni ataatsimiissaaq.