Arnat spiralilerneqarnikut ullumi utoqqatserfigineqassapput
Ministeriuneq Mette Frederiksen arnanut utoqqatsiinnarani iliuuseqarnerusariaqartoq arlallit oqaatigaat.
Ministeriuneq Mette Frederiksen spiralilersuisimaneq pillugu pisortatigoortumik utoqqatsissutigissallugu Nuummiippoq.
Assi: Mads Claus Rasmussen / Ritzau Scanpix
Kalaallit arnat niviarsiaqqallu 1970-ip naanerani ikinnerpaamik 4070-it spiralilerneqarsimapput. Amerlasuut akuersiteqqaarneqaratik.
Spiralilersuisimaneq pillugu qulaajaanerup arlaannaannulluunniit attuumassuteqanngitsup tamanna uppernarsarpaa. Ministeriuneq Mette Frederiksen (Socialdemokraterne) aamma Naalakkersuisut siulittaasuat Jens-Frederik Nielsen (D) misissuinerup naammassinissaanut sapaatip-akunneri marluk sioqqullugit arnanut eqqugaasunut pisortatigoortumik utoqqatserput.
Tamanna Nuummi Katuami nalunaaqutaq 14.00 malunnartinneqassaaq.
- Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga., Mette Frederiksen aggustip 27-ani tusagassiuutitigut nalunaarummi oqarpoq.
Erinarsoqatigiittoqassaaq, naalakkersuisut siuttui arnallu pineqartut oqalugiassapput, tamatumalu kingorna arnat najuuttut assamminneqassapput.
Arnarpassuit anniaateqartalerlutillu tarnikkut nanertuuteqalissutigigaat
Spiralilersuisimaneq pillugu suliaq 1960-ikkunni aallartinneqarnerata kingorna qanoq pisoqarsimanersoq, aalajangiinerit suut tunngavigineqarsimanersut 1991-illu tungaanut qanoq pisoqarsimanersoq Ilisimatusarfiup issittumi atugarissaarneq pillugu ilisimatusarfianneersut ukiuni marlunni qulaajaaffigaat.
Arnat 354-it qanoq pineqarsimanertik pillguu qulaajaasunut oqaluttuarput. Arnat pisup kingorna ilukkut anniarnernik, sakkortuumik aaqartarnermik, puallanermik tarnikkullu nanertuuteqalernikkut kingunerluuteqarsimapput.
Amerlanerillu akuersitinneqaqqaarsimanngillat.
Pele: Utoqqatserneq iliuuseqarnermik kinguneqanngitsoq naammanngilaq
Taamaattumik arnat 143-t danskit naalagaaffiannit taarsiivigineqarnissamik piumasaqarlutik 2024-mi eqqartuussivimmut suliassanngortippaat.
Naleqqallu siulittaasuata Pele Brobergip naalagaasuuguni ministeriuneq Mette Frederiksen taarsiissuteqarnissaq pillugu nutaarsiassaateqanngikkuni ullumi tikeqqunngiinnassagaluarpaa.
- Danmark iliuuserisimasaminut qimaariaqqiffissaaruppoq. Mette Frederiksen nunatsinnut utoqqatsersimanini oqaasiinnaasut uteqqiinnassagunigit, taava inuiatsinnut misiginerlutsitseqqiinnassaaq, tusagassiuutitigut nalunaarummi septembarip qulingani nassiunneqartumi allappoq.
Ministeriuneq taarsiissuteqarnissaq pillugu nutaarsiassaateqarani sapaatip-akunnerata siuliani oqarpoq, kisinni Naalakkersuisuit alloriaqqinnissaq pillugu oqaloqatigineqarlutillu isumaqatiginiarnerarlugit.
Saammaateqatigiinnissamik aningaasaateqarfittaarniartoq
Danskit naalakkersuisui saammaateqatigiinnissamik aningaasaateqarfimmik taaneqartartumik pilersitsinissamut maanna piareertut tusagassiuutitigut ataasinngormat nalunaarutigineqarpoq. Aningaasaateqarfik kalaallinut kalaaliunertik pissutigalugu naapertuilluanngitsumik pineqarsimasut aningaasatigut taarsivigineqarsinnaalissallutik.
Assersuutigalugu arnat spiralilersorneqarsimasut.
Taarsiissuteqartoqarnissaanut qanoq suleriuseqartoqassanersoq suli inissinneqanngilaq. Taanna pillugu Mette Frederiksenip Nuummiinnerminni Jens-Frederik Nielsen oqaloqatigissavaa.
