Ataatsimiititaliami pissaaneqarfiusumi Peter Olsenip Asii taarsissavaa
Inatsisartut ataatsimiititaliaani ilaasortat nutaamik agguataarneqarput.
Peter Olsen Aningaasaqarnermut Akileraartarnermullu Ataatsimiititaliami siulittaasunngorpoq.
Assi: Leiff Josefsen
IA-mi ilaasortatoqaq Asii Chemnitz Narup politikkimit tunuartoq, ataasinngormat saqqummiunneqarpoq. Maanna Inatsisartuni ilaasortaajunnaarpoq, taamaalillunilu ilaatigut Aningaasaqarnermut Akileraartarnermullu Ataatsimiititaliaq siulittaasueruppoq.
Inatsisartut ataatsimiititaliaani ilaasortassanik maanna toqqaasoqarpoq, IA-meersorlu Peter Olsen Aningaasaqarnermut Akileraartarnermullu Ataatsimiititaliami siulittaasutut Asii Chemnitz Narupimik taarsiisoq, tassani erserpoq.
Ukiakkut ataatsimiinnermi ilaatigut aningaasanut inatsisissatut siunnersuut akileraartarnikkullu aaqqissuusseqqinneq ataatsimiititaliap suliarissavai.
Naleqqap siulittaasua Pele Broberg ataatsimiititaliami siulittaasup tulliatut ingerlaqqippoq.
Qinigaaffimmi matumani Peter Olsen Ilinniartitaanermut, Kultureqarnermut, Timersornermut Ilageeqarnermullu Naalakkersuisutut Naalakkersuisunut ilaasortaavoq.
2023-mi upernaakkut illuatungiliuttut tatiginnikkunnaarnermik taasititsinerannut atatillugu Peter Olsen Naalakkersuisunit tunuarpoq.
