Ataatsimiititaliami siulittaasoq atuivallaarneq pillugu: - Peqqissumik inuuneqarnissamut peqataagitsi!
Qeqqata Kommuniani Atugarissaarnermut ataatsimiititaliami siulittaasoq innuttaasut peqqissumik inuuneqaqqullugit kaammattuivoq. Kommunimimi atugarissaarnermut aningaasartuutit 3.147.036 koruuninik amerlanerunerat pissutigalugu taama kajumissaarivoq.
Foto: Johannes Ujo Müller
Sisimiuni utoqqaat angerlarsimaffianni Qupanummi 503.385 koruuninik atuivallaartoqarsimavoq.
Ataatsimiinnermit imaqarniliami allassimavoq sulisut napparsimanertik, erninerminni sulinngiffeqarnertik sulinngiffeqartarnertillu pissutigalugit sulinngitsoortartut amerlasut, pisariaqartumillu isumaginninnissamut taartaasartunik pisariaqartitsineq annertusoq pissutaanerpaasut.
Juliane Enoksenip aningaasanik atuivallaarnerit suulluunniit akueriuminaattartut oqaatigaa. Ullorli unnuarlu sullittariaqakkat sulisussaqanngippata taartasussanik sulisussaqarniarnikkut aningaasanik atuiffigineqartariaqarnerarlugit.
- Atuivallaarnermulli peqqutaasartut inatsisit tunngavigalugit piusarpoq. Soorlu ulloq unnuarlu sullittariaqakkagut, sulisussaqanngippata, immikkut taartaasussanik atuiffigisariaqartarpagut. Taakkuli ukkappagut.
Pisortat qanimut suleqatigalugit aaqqiinissamut suleqatigiittut, Juliane Enoksen oqarpoq.
Siusinaartumik sulisinnaanersiutillit aningaasartuutaapput
Aningaasanik atuiffiusut ilaatigut tassaapput siusinaartumik utoqqalinerliutillit.
- Immikkut aamma taarusutagut tassaapput, siusinaarlutik utoqqalinersisariaqartut qaffakkiartoramik. Ilisimariikkatsitut innuttaasut 50-kunni 60-kkunnilu inuunikut, timikkut tarnikkullu nungullartut arlaqarput, sulerulussimanermik.
- Taakkuuppullu inatsit malillugu pisinnaatitaaffiinik ikiorsigassagut.
Taassuma ilanngullugu oqaatigaa siusinaarlutik utoqqalinersiallit ilaat tatitorsarlugit perorsarneqarsimanngitsut:
- Pingaartumik angajoqqaatut tatittorsaasimanngikkaangatta, meerartatta inuusuttuaranngorlutik aannagajaarniutinik atuilernermikkut, eqqarsartaatsip innarlerneqarneratigut, sulisinnaajunnaartartut takujuartaleratsigit.
- Taakkuusarpullu aamma siusinaartumik sulisinnaajunnaarnermusiaqartinneqartariaqartartut. Aningaasalersortariaqakkagut inatsisit malillugit.
Taamaattumik Juliane Enoksen peqqinnarnerusumik inuuneqarlernissamut inuiaqatigiinnut kaammattuivoq:
- Taamaammat kaammattuissaagut innuttaasunut peqqissumik inuuneqarnissamut peqataaluinnaqqullugit, tamattaalluta tamanna aaqqiiffigisariaqaratsigu, Juliane Enoksen, Atugarissaarnermut ataatsimiisitaliamiik ilaasortaqatini sinnerlugit oqaaseqarpoq.
