KL

DK

Atuarfiup pisortaa atuarfik piariinngitsoq soraarpoq

Atuarfiup pisortaa Uffe Lilholm, Atuarfik Inussuk pillugu takorluugaqarsimagaluartoq, atuarfittaaq atulinngitsorluunniit soraarniuteqarpoq

Atuarfiup pisortaata Uffe Lilholmip toqqarpaa Atuarfik Inussuk suli atuarfigineqalinngikkaluartoq tunuassalluni, uani assimi taanna takuneqarsinnaavoq atuarfimmik takornariartitsinerata nalaaneersoq.
Oline Inuusuttoq Olsen
tusagassiortoq
Offentliggjort

Atuarfik Inussummi pisortatut atorfimmut qinnuteqarfissaq decembarip tallimaanut killeqarpoq. Inuttassarsiornermi Atuarfik Inussuk Nuup qeqqani illorsuit nutaarluinnaat ’iserterfigeriaannanngulersut’ allassimavoq. Atuarfiup pisortassaata atuarfittaami takorluukkat piviusunngortitseqataaffigissagai naatsorsuutigineqarpoq.

Atuarfimmi pisortaq Uffe Lilholm atuarfik nutaaq suli atulertinnagu soraarniarluni aalajangersimavoq. Atuarfitoqqani marlunni Atuarfik Samuel Kleinschmidtimi aamma Atuarfik Ukaliusami atuartut 1.200-t Atuarfik Inussumut nuuppata kulturikkut allannguinissamik takorluugaqarsimagaluarpoq.

Siunissami atuarfissaq

Uffe Lilholmip meeqqanut, ilaqutariinnut atuarfeqarnermullu ataatsimiititaliami pisortaq Lone Nukaaraq Møller, politikerit atorfilittallu ilagalugit Nuup qeqqani atuarfittaassaq takutillugulu siunissami atuarfissaq pillugu takorluukkani saqqummiuppai.

”Atuarfimmi pisortaq Uffe Lilholm atuartitsinermi periutsit nutaat, pisinnaasat suliniutillu aallaavigalugit ilinniartitsinerit kiisalu atuarfiup atuartunut ineriartorluarfiulluni ilikkagarfiunissaa pillugit oqaluttuarpoq”, Kommuneqarfik Sermersuup nittartakkatigut nutaarsiassiissutaani allassimavoq.

Tassanittaaq Atuarfik Inussummi atuartunut angajullernut init atuaqatigiinnut iniunatik faginik aalajangersimasunik atuartitsviussasut, assersuutigalugu ini atuaqatigiit aalajangersimasunit inigineqarani kisiannili tamanit matematikkertarfittut imaluunniit pinngortitalerinermut atorneqartassasoq Uffe Lilholmip oqaluttuaraa.

Atuarfiit pisoqqat nungullarsimasullu pisortaat

Uffe Lilholmip aggustimi Atuarfiup Inussuup kingusinaarluni atulertussanngoraluartoq Atuarfik Inussummilu atuartut atuarfinnut pisoqqanut nungullarsimasunullu agguataarneqarneqaraluartut aniguguinissaminik takorluukkallu atuarfittaamut tunngasut ingerlaannarnissaannik neriuuteqarniarsimagaluarpoq.

Atuarfik Inussummi atualerneq aggustip naanerani pissasoq Kommuneqarfik Sermersooq aallaqqaammut nalunaaraluartoq aggustimi atualerneq puullaaqinermik paatsiveerusimaarnermillu sunnerneqarpoq.

Atualernerli aggustip 15-iani pilersaarutaasoq sapaatip-akunneranik sioqqullugu atualertussat pilersaarutit malillugit, kisiannili atuarfitoqqani matusani, ukioq atuarfiusoq aallartissagaat nalunaarutigineqarpoq. Tassani ilinniartitsisut atuarfitoqqat piareersarlugit ulappullutillu atuartitsisutissat amigaataasut qarasaasiaqarniarnerlu ajornartorsiutigaat.

Uffe Lilholmip soraarniuteqarnini Sermitsiamut oqaaseqarfiginngilaa. Atuartut qaqugu Atuarfik Inussummi aallartissinnaanersut suli nassuiarneqanngitsoq sooq soraarniarluni aalajangernersoq paaserusussimagaluarparput

inuiaqatigiit folkeskolen samfund skolebyggeri kommuneqarfik sermersooq

ATORFIIT Se alle jobs

Powered by Labrador CMS