KL

DK

Saarulliit Nutaami tunisassiat ukioq manna aatsaat taama amerlatigisut Royal Greenland nalunaarpoq

Aalisartut 150-it missaanniittut Royal Greenlandip suliniutaani Nutaami saarulliit 10.000 tonsit tunivaat.

Maniitsumi suliniummi Nutaami sulisut 120-upput.
Morten Okkels Tusagassiortoq
Saqqummersinneqarpoq

2024-mi saarulliit Nutaami pisarineqartut, apriilimit oktobarimut sinerissap qanittuani aalisarneqartut, aatsaat taama amerlatigipput. Periuseq Nutaaq Royal Greenlandip periaaseraa, tassani aalisakkat uumasut immamit qaqinneqarnerinit akunnerit marluk qaangiutsinnagit qeritinneqartarlutik.

Ukioq manna saarulliit 10.000 tonsit tunineqarput, tamannalu ingerlatsinermut pisortap Sten Sørensenip soorunami nuannaarutigaa:

– Rekordiliineq pingaaruteqarpoq, pikkorissunilli sulisoqarsimanngitsuugutta angusimanavianngikkaluarparput. Maniitsumi tunisassiorfiup ingerlatsisua, Susanne Marie Olsen, suleqatinilu ulapingaatsiarsimapput, taamatuttaarlu aalisariummi uumatitsivissortumi sulisut sapinngisamik saarullinnik amerlanerpaanik aalleqattaarlutik sulilluarsimaqaat, taanna oqarpoq.

Aalisartut 150-it missaat suliniummi peqataasimapput, ilaatigut Karl Lyberth Maniitsumeersoq:

– Nutaaq-tut tunisassiassanik aalisarneq tamatsinnut iluaqutaavoq – annerusunik aalisariutaatilinnut pingaarnertulli umiatsiaararsortunut. Aningaasaqarnitsinnut iluaqutaaginnarnani sulinerput pisariinnerulerlunilu pitsaanerulerpoq. Suliniut torraqaaq, neriuppungalu sinerissami aalisartut amerlanerit siunissami atorluarumaaraat, taanna oqaluttuarpoq.

Ukiaanerani saarulleqangaatsiarnerata malitsigisaanik ulapputoqarneroqaaq. Royal Greenlandip taamaalilluni suliniutip siunissami annertusarnissaanut periarfissat misissuleruttorpai, tusagassiuutinut nalunaarummi suliffeqarfik allappoq.

samfund inuiaqatigiit

ATORFIIT Se alle jobs

Powered by Labrador CMS