KOMMUNALBESTYRELSEMUT QINERSINEQ 2025
Avaaraq Olsen (IA) borgmesteritut ingerlaqqikkusulluni qinigassanngortippoq
Borgmester Charlotte Ludvigsenip (IA) borgmesteritut maanaannaq tunuarnerata kingorna, Avaaraq Olsen borgmesteritut ivertinneqarnikuuvoq. Maanna taassuma inissisimaffini attatiinnarniarlugu borgmesteritut sassarnini Nuummi Inuit Ataqatigiit aaqqissugaannik ullaakkorsioqatigiinnermi nalunaarutigaa.
Assiliisoq: Leiff Josefsen
Kommuneqarfik Sermersuumi borgmesteri, Avaaraq Olsen (IA) maanna nalunaaruteqarpoq borgmesteritut ingerlaqqinnissani siunertaralugu sassarniarluni:
- Piffissami sivisujaami eqqarsaatigisimavara borgmesteritut sassaqqissanerlunga. Ilaquttakka, parteeqatikka aamma kommunitsinni politikerit allat aqqutaani oqaloqatigisimavakka. Maannalu aalajangerpunga borgmesterissatut sassarniarlunga, Kommuneqarfik Sermersuumi borgmesteri Avaaraq Olsen (IA) oqaluttuarpoq.
- Siullermik ajornakusoorsimavoq - maannakkut piareersimavunga
Avaaraq Olsenip nalunaarutaa ullaaq manna ullaakkorsioqatigiinnermi, Nuummi Inuit Ataqatigiit aaqqissuussaanni saqqummiunneqarpoq, tassanilu Inuit Ataqatigiit siulittaasuat aamma Naalakkersuisut siulittaasuat, Múte Bourup Egede (IA) aamma IA-meersut allat nuna tamakkerlugu kommunimilu qinikkat peqataapput.
Avaaraq oqaluttuarpoq borgmesterinngoqqaarami aallaqqaammut assut pissangasarsimalluni, kommunalbestyrelsimi unammilligassat nutaatqanoq ittuussanersut eqqarsaatigalugit. Kisianni tamanna sukkasuumik nuannaarnermik suliamillu aallussilluarnermik suleqatigiilluarnermillu taarserneqarpoq, aamma partiit akimorlugit suleqatigiinneq eqqarsaatigalugu:
- Misilittagaqarfigillualeriartupallappara suli aamma misilittakkanik nutaanik katersivunga. Suliassaqarfimmi ineriartorpunga aamma maanna nalorninanga aalajangerpunga suliakka nanginniarlugit sassassallunga, Olsen Sermitsiamut oqaluttuarpoq.
Taassumattaaq oqaluttuaraa misigisimalluni partiinut katersuuffiusinnaalluarluni aamma qulakkeerisinnaalluni patajaatsumik ingerlatsisoqarnissaanut:
- Pingaaruteqarpoq politikkikkut ataqatigiissitsineq kommunitsinni pigiuassagatsigu. Kommunerput kangianiit kimmut siammasissuuvoq aamma nunatsinni inuttunerpaaffiulluni, taamaattumik unammilligassarpassuaqarpugut. Misigivunga kommunitta ineriartortinneqarnerani sulinissamut piginnaasat pisariaqartut pigalugit, taamaattumik aalajangiusimavunga borgmesteritut ingerlaqqinnissara siunertaralugu qinigassanngortissallunga, Kommuneqarfik Sermersuumi borgmesteri Avaaraq Olsen (IA) Sermitsiamut oqarpoq.
