KL

DK

BankNordikip Kalaallit Nunaat immikkut unammillernartoqannginnerarpaa

Inuussutissarsiortut ataasiakkaat unammilligassaqarnerat pissutigalugu BankNordik millionilikkaanik immikkoortitsisariaqarsimavoq. Tamannali Kalaallit Nunaanni niuernerup immikkut unammilligassaqarneranut takussutissaanngilaq, aningaaserivik Sermitsiamut erseqqissaavoq.

BankNordikip Kalaallit Nunaanni qullersaqarfia Nuummiittoq
Tusagassiortoq
Saqqummersinneqarpoq

BankNordikip 2024-mi ukiup affaani siullermi isertitai 44 millionit koruuninit 67 millionit koruuninut amerleriarsimapput, tamannalu taarsigassarsisitsisarnerit amerleriarnerannik ernianullu atugassarititaasut pitsaanerulernerannik pissuteqartoq BankNordik ilisimatitsivoq.

Aningaaseriviup immikkoortitai, aningaaserivimmut annaasaqaataasinnaasut, ukiup affaani aningaasat 8 millionit koruuninit 33,6 millionit koruuninut amerlisimapput.  Tamannali Kalaallit Nunaanni aningaaserivinnik ingerlatsinerup immikkut unammillernartuuneranik takussutissaanngilaq.

- Naamik, 2024-mi ukiup affaani siullermi ingerlatsinitsinni tunngaviusumik ineriartorneq naammaginartoq siorna piffissamut tassunga sanilliullugu malugisinnaavarput. 2024-mi ukiup affaani siullermi 2023-mi piffissamut tassunga sanilliullugu Kalaallit Nunaanni niuernitsinni ineriartorneq pitsaalluinnartoq malugisinnaavarput, sullitat amerliartorput aamma aningaasanik toqqorsinerit, taarsigassarsinerit aamma realkredit-imik taarsigassarsititsinerit amerleriarput, aningaaserivik Sermitsiamut oqarpoq.

Nalinginnaasumik ingerlalissasoq

2024-mi nalikilliliineq nalinginnaasumik ingerlalissasoq aningaaseriviup aamma naatsorsuutigaa.

- 2024-mi kvartalimi siullermi nalikilliliinerit aningaaseriviup sullitaasa nalinginnaasumik unammilligassaqarneranik takussutissaanngillat, akerlianilli akiitsunut pitsaasunut uppernarsaataapput, tamannalu 2024-mi kvartalimi siullermit 2024-mi kvartalip aappaanut nalikilliliinerit ineriartornerannit aamma erseqqissarneqarpoq, aningaaseriviup oqaatigaa.

Savalimmiuni Kalaallit Nunaannilu illunik inissianillu niuerneq Aningaasaqarnermut nakkutilliisoqarfiup misissorsimavaa, niuerfinnilu pineqartuni najugaqarfissanik inuussutissarsiortunulluunniit atugassanik illusinermut atatillugu taarsigassiinermi ilaatigut annertunerusumik aningaasaliisinnaanissaq pisariaqartassasoq inernilerneqarpoq.

Aningaasaqarnermut nakkutilliisoqarfiup aalajangiinera inissiaateqarsimasunut imaluunniit inissiaateqarumasunut aningaaseriviup sunniuteqassasorinngilluinnarpaa.

- Aningaasaqarnermut nakkutilliisoqarfiup aalajangiinerata kingunerisaanik inissianut ineqarfinnullu atortussanut taarsigassarsiat taamaallaat ilanngaaserneqarsinnaapput piumasaqaatit aalajangersimasut naammassineqarpata. Nammineq inissianut pigisanut taarsigassarsititsinerit taakkuninnga atuutsinneqannginnissaannut aalajangersakkanik naammassinnissinnaasarput, atorfimmullu atatillugu inissianut taarsigassarsititsinerit aamma appartinneqarsinnaapput, inissiaq attartortitaq immikkoortutut namminersortutut avinneqarsinnaappat, nammineq inissiatut pigisatut tuniniaqqinneqarsinnaajumaarluni, banki nassuiaavoq nangillunilu:

Kinguneqartinneqassanngilaq

- Inissianut inuussutissarsiutinullu illuutinut taarsigassarsiat nalorninartoqanerannik oqimaaqatigiissaarinerup annertunerulerneratigut tamanna uagutsinnut aalajangiisuussaaq, aamma RVA-p 200 millionit koruunit missaannik annertunerulerneranik malitseqarluni. Tamannalu ukiup affaanut kisitsisinut ilanngunneqarpoq. Kalaallit Nunaannut tunngatillugu kisitsisit tamanut saqqummiutinngilavut. Aningaasaqarnermut nakkutilliisoqarfiup inerniliussaa maannakkut atuisunut siunissamilu inuinnarnut atuisunut ineqarnermut taarsigassarsiaannut sunniuteqassanngilaq.

økonomi samfund banknordik finans finanstilsynet grønland inuiaqatigiit

ATORFIIT Se alle jobs

Powered by Labrador CMS