Aggustip 20-anni unnuakkut pingasut
missaanni, Jens Mikkelsenip mobilia unnuap taarnerani sianeqattaarpoq.
Jens Mikkelsen Kommuneqarfik Sermersuumi
upalungaarsimanermut pisortap tullia unnuaq taanna upalungaarsimasutut
iliuuseqartussatut pigaartuuvoq.
Aggustip 20-anni unnuakkut pingasut
missaanni, Jens Mikkelsenip mobilia unnuap taarnerani sianeqattaarpoq.
Jens Mikkelsen Kommuneqarfik Sermersuumi
upalungaarsimanermut pisortap tullia unnuaq taanna upalungaarsimasutut
iliuuseqartussatut pigaartuuvoq.
Nuummi aqqusinermi 400-rtalimmi aqqusinikkut
angallannermi ajutoortoqarsimasoq nalunaarutigineqarpoq. Ajutoortoqarneranut
atatillugu ikuallattoqarpoq.
Ikuallattoqarnerani biilertoq ajutoorsimasoq
nalunaarutigineqarpoq.
Suliassarpassuaqartoq
Jens Mikkelsen biilimik ajutoorfimmut
ingerlavoq suliassaminullu piareersarluni.
- Ambulancet politiillu takkussimapput,
taamaalillungalu ikuallattoq qaminniarlugu aallunnerusinnaavara, Jens Mikkelsen
oqaluttuarpoq.
Upalungaarsimanermut pisortatut
ajutoorfiusumut apuukkaangama iliuuserisassarpassuaqartarpoq. Pingaarnertut
suliassaasarlutik inuit ajutoortut isumannaatsumut pisinnissaat, ajutoornerullu
ajornerulinnginnissaa. Soorlu ajutoorfiusup eqqaani najugaqartut putsumut
toqunartulimmut illersorneqarnissaat.
- Pujoq sumiiffimmut uloriananngilaq,
tamaanimi inoqanngimmat. Biililli innaallagissamut napparut aporsimavaa,
taamaattumik Nukissiorfiit attaveqarfigaakka sumiiffimmi innaallagiaq
qaminneqarniassammat.
- Ingerlaannarlunga takusinnaavara biili
ikummatissamik innaallagissamillu ingerlateqartoq ion-batteriqartoq,
taamaattumik qatserisartut siulliit Nuussuarmi qatserisartoqarfimmeersut
attaveqarfigaakka, pisumillu ilisimatillugit. Benzinamik kuuttoqarmat batterii
ikuallanngitsutut nalilerpara, taamaattumik qatsereqqaarnermi qapuk imerlu
atorneqartariaqartut.
Ujaraaqqat qitsuit perusuersartarfii
- Suliaq iluatsilluarpoq – pisoqarfiusumilu
benziina kuussimasoq ujaraaqqanik qitsuit perusuersartarfiinik
milluartissinnaasimavarput, Jens Mikkelsen naammagisimaarinnilluni
oqiliallassimallunilu oqarpoq. Tassami batteri ikuallassimagaluarpat
ajornerujussuarmik pisoqarsimassagaluarpoq. Qujanartumik atortussanik
ikiorsiissutinik upalungaarsimasunit biilinik innaallagiatortunik
ikuallattoqarnissaanut atorneqartartunik pisariaqartitsinngilagut.
- Batteriit ikuallassimanersut
paasiniarlugit siullermik kiassuarmik assiliisartoq atortarparput.
Ikuallassimappat anersaartornermut illersuut atortarparput, batteriit
pujuliortarmata toqunartortalinnik. Aamma aaqqatit kummiusut atortarpavut,
batteriit qupinnguallaffiusinnaammata. Kiisalu atortorparput batteriit
ataatsikkut kipisinnaallugit.
- Siullertut assiliivik kissartunik
malussarniutilik atortarparput, batteriit ikuallannersut paasiniarlugit.
Taamaattoqarpat anersaartuutinik pisariaqartitsissaagut, batteriimmi ioniusut
putsumik toqunartulerujussuarmik pujuliortitsisinnaammata. Taava aamma
atortorissaaruteqarpugut batteriinik qamitsisinnaasumik.
- Iliuuserineqaqqaartussatut biilinut
ikuallattunut tippiuteqarpugut. Taanna biilimut ikuallattumut
qalliutigineqartarpoq inneq sakkukilliniassammat. Tamatuma saniatigut
tissalutsitsisinnaasumik qamutaasaqarpugut, biilip ikuallattup ataanut
pisinneqarsinnaasumik ikuallattumut nillusaataasinnaasumik. Tamakku saniatigut
biiliutilimmut containerimik pissarsiniarsinnaavugut, biili ikuallattoq
qamissinnaanngikkutsigu, biili tassunga inississinnaagatsigu.
Atortussat nutaat
tikisinneqangajalersut
- Ukioq manna kingusinnerusukkut biili
nutaaq containerilik biilinik innaallagiatortunik ikuallattoqartillugu
atorneqartussaq pissarsiarigutsigu tamanna allanngorumaarpoq. Qujanartumik suli
pisariaqartilluinnanngilarput, biilinik innaallagiatortunik ikuallattoqartarnera
qaqutigoortuummat. Biilit nalinginnaasut benziinamik dieselimilluunniit
tankianniittoqarpat ikuallattoornissaq qaninnerusarpoq.
- Siunissamili taamaattunik
naammattoorsissajunnarsivugut. Taamaattumillu tamakku piareersimaffiginiarlugit
upalungaarsarluta aallartereerpugut.
- Greenland Airports suleqatigalugu
sungiusartarfimmik nutaamik sanaartorpugut, taanna mittarfiup eqqaani
inissisimassaaq taamaalillutalu Nuukullammi sungiusartarfitsinnut
taarsiutissallutigu. Sungiusartarfik
nutaaq gassimik ikummateqassaaq, maannakkummi mingutsitsinngitsumik
ingerlatsinissaq pingaartinneqarluinnarmat, sungiusarniarlunimi ikummatissamik
atuineq pitsaavallaanngimmat.
Jens Mikkelsen Nuummi upalungaarsimasuni
2003-mili sulisimavoq. Taanna ullutsinni Kommuneqarfik Sermersuumi
upalungaarsimanermut qullersamut tulliuvoq tamatumunngalu peqatigitillugu
paarlakaallutik upalungaarsimasartunut ilaasarluni.
- Upalungaarsimanermut pisortap tulliatut
pingaarnerpaamik upalungaarsimanermut tunngasut akisussaaffigaakka, aamma
ikuallattoqartillugu misissuisarpunga. Aamma upalungaarsimanermut pisortaq Jes
B. Andersen peqatigalugu pinaveersaartitsinermik suliaqartarpunga, Jens
Mikkelsen oqarpoq.
