Kommune
Qeqertalimmi borgmesterip Simigaq Heilmannip, Demokraatit, qinersisartunit
nuannarineqarluarnera qularutissaanngilaq.
11. marts Inatsisartunut
qinersinermi 70-inik taaguunneqarluni Inatsisartunut ilaasortanngorpoq, apriilillu
aallaqqaataani kommunalbestyrelsinut qinersinermi amerlanerpaanik, tassa
204-nik, taaguunneqarluni Kommune Qeqertalimmi kommunalbestyrelsimut
ilaasortanngorpoq.
Kommune
Qeqertalimmi borgmesterip Simigaq Heilmannip, Demokraatit, qinersisartunit
nuannarineqarluarnera qularutissaanngilaq.
11. marts Inatsisartunut
qinersinermi 70-inik taaguunneqarluni Inatsisartunut ilaasortanngorpoq, apriilillu
aallaqqaataani kommunalbestyrelsinut qinersinermi amerlanerpaanik, tassa
204-nik, taaguunneqarluni Kommune Qeqertalimmi kommunalbestyrelsimut
ilaasortanngorpoq.
Qinersinerup
kingorna politikkikkut uivernartut arlallit pereersullu Simigaq Heilmann
Qeqertarsuarmi najugaqartoq, borgmesterinngorpoq, taannali Qeqertarsuarmi
Aasianniluunniit najugaqassanersoq qaammatini kingullerni
nalornissutaareersorlu, Aasiannut nuussalluni borgmesterip nalunaarutigaa.
Siumup
aquut sapangikkaa
Kommune
Qeqertalimmi kommunalbestyrelsimut qinersinermi Siumut arfinilinnik
ilaasortaatitaqalerluni ajugaanermigut, politikkikkut aquummik qularnaatsumik
tigusivoq. Tamatuma kingunerisaanik Siumut, Atassut aamma Naleraq
suleqatigiinnissamut isumaqatigiissuteqarput, siullermeerlunilu politikkimut
pulasoq Aasianneersoq Aqqalu Reimer, Siumut, 131-nik taaguunneqarluni
kommunalbestyrelsimut ilaasortanngortoq, borgmesterissatut innersuunneqarpoq.
Piffissalli sivikitsuinnaap iluani Siumup aquut sapangippaa, Naleqqallu
suleqataajunnaarneratigut Demokraatit, Naleraq aamma Inuit Ataqatigiit
suleqatigiilerput.
Akunnerminni
isumaqatigiinngitsut
Kommune
Qeqertalimmi politikkikkut suleqatigiilersut Simigaq Heilmann borgmesterissatut
innersuuppaat, Qeqertarsuarmilu innuttaasunit nuannaarutigineqaqisumik 2. maj
borgmesteritut ivertinneqarpoq, tamatumalu kingunerisaanik Inatsisartuni
ilaasortaanermik sulinngiffeqarniarluni aalajangerpoq.
Kommune
Qeqertalimmi borgmesteri kommunaldirektørilu Qeqertarsuarmi najugaqarnissasut,
tamannalu nuannaarutigigini Simigaq Heilmannip 15. maj avammut nalunaarutigaa -
tamannali kommunalbestyrelsimi suleqatigiilersut akornanni
isumaqatigiinngissutaasoq paasinarsivoq.
Borgmesterip
kommunaldirektørillu allaffiisa Aasianniit Qeqertarsuarmut nuutinneqarnissaat
borgmesterip kisimiilluni aalajangersinnaanngikkaa, tamannalu pissappat
kommunalbestyrelsimi aalajangerneqassasoq, Ilisimatusarfimmi ilisimatusartup
erseqqissaatigaa. Aammali politikkikkut aalajangigassat annertuut
kommunalbestyrelsip kisimi aalajangiiffigisinnaagai, Inuit Ataqatigiinni
politikerip nuimasup Kristian Jeremiassenip erseqqissaatigaa.
- Borgmesterip
sumi najugaqarnissaa pillugu qinersisoqartassanngilaq, innuttaasulli
pitsaanerpaamik sullinneqarnissaat pillugu qinersisoqartassaaq.
- Taamaattumik
Aasiaat qitiusumik allattoqarfittut inissisimanissaa aammalu borgmesterip
kommunaldirektørillu tassani najugaqarnissaat pillugu 2017-mi aalajangigaq
allanngortinneqanngippat taanna malinneqartussaavoq, Kristian Jeremiassen
oqarpoq.
Piumasani
pinngikkaa
Simigaq
Heilmann Qeqertarsuarmi borgmesteriusinnaanani Aasiannullu nuuttariaqalerluni,
tamannali nammineerluni kissaatigisimanngikkaluarini, juulip aallaqqaataani
Facebookimi politikeritut quppernermini nalunaarutigaa.
- Piumasara
pinngilara. Borgmesteriullunga Qeqertarsuarmiuusinnaanngilanga. Qitiusoqarfik
borgmestereqarfillu Aasianniinnissaat 2017-mi kommunalbestyrelsimit
akuerineqarsimasoq aalajangiusimaannarneqarusuppoq. Tamannalu isumaqarpoq
Aasiannut nuuttariaqartunga.
- Amerlasuut
ilisimavaat borgmesterinngorama kissaatiginikuugiga borgmesteri pisortaanerlu
Qeqertarsuarmiissasut.
- Amerlanerussutillit
isumaat ataqqivara. Taamaattoq kissaatigisimagaluarpara, kommuninniikkama
periarfissaasariaqaraluartoq nunanniillunga borgmesteriusinnaanissara, taanna
oqarpoq.
Kommune
Qeqertalimmi innuttaasut suminngaanneernerat apeqqutaatinnagu assigiimmik
sullinneqarnissaat pingaartikkini, tassuma erseqqissaatigaa.
Neriorsuut
eqquutsinneqanngitsoq
Borgmesterip
Aasiannut nuunniarluni nalunaaruteqarnera paasiuminaatsikkini,
kommunabestyrelsimut ilaasortaq aamma Siumup gruppiani siulittaasoq Aqqa
Samuelsen oqarpoq.
- Borgmesterip
Qeqertarsuarmi najugaqaannarnissani innuttaasunut neriorsuutigereeraluarpaa.
Maannakkut Aasianni najugaqartussanngornini pillugu avammut nalunaaruteqarnera
qinersisartunik inuiaqatigiinnillu neriorsuummik unioqqutitsineruvoq, taanna
oqarpoq.
Borgmester
Simigaq Heilmannip taamatut avammut nalunaaruteqarnera, kommunalbestyrelsimi
suleqatigiit iluminni isumaqatigiinngissuteqarnerannik tunngaveqarsorinartoq,
Aqqa Samuelsen isumaqarpoq.
