INEQARNEQ PILLUGU AAQQISSUUSSEQQINNEQ
Borgmesteri Ane Hansen: Kommunit ilinniarfigineqarlik
Kommune Qeqertalimmi borgmesteri, Ane Hansen (IA), Inatsisartut ineqarneq pillugu oqallinnerannut kissassimaarfioqisumut isummersorpoq. Taanna isumaqarpoq Inatsisartut aamma Naalakkersuisut kommunit inissiaatiminnik aqutsinerminni periuserisaat ilinniarfigisinnaagaat, akiviusummi tunngavigalugit inissiat attartortittakkat kommuninit ingerlanneqarmata.
Kommune Qeqertalik-mi borgmesteri, Ane Hansen (IA), naammagisimaarinnippoq Inatsisartut nuna tamakkerlugu ineqarnermut aaqqissuusseqqinneq tunngavigalugu ilusilersuiniarlutik oqallimmata. Taamaattorli kaammattuutigaa Inatsisartut aningaasartuutaanerulersussanik inatsisiliussagunik, taava aningaasaqarnikkut kingunerisassat aamma matussuserneqarsinnaassasut kommuninullu kinguneqartitsinnginnissaat aallaaviussasoq.
Assiliisoq: Jensine Berthelsen
Nuna tamakkerlugu borgmesterit kommunalbestyrelserillu allatulli soqutiginnillutik malinnaasutut malinnaaqqissaarput Inatsisartut ineqarnermut tunngatillugu oqaluuserisarpassui pillugit, taakkulu ataatsimoortumik ineqarneq pillugu aaqqissuusseqqinnermut tunngatinneqarput.
Tassami inissiaqarnermut tunngatillugu kommunit namminersorlutillu oqartussat aqutsinerat assigiinngissuteqarpoq, matumani aamma kommunit inissianik attartortittakkanik aqutseriaasiat aamma namminersorlutik oqartussat inissianik attartortittakkanik aqutsinerat assigiinngissuteqarlutik.
- Soorunami Inatsisartut inatsisissanik suliarinninnermut atatillugu oqallinneri malinnaavigaakka, matumani ilanngullugu ineqarnermut tunngassuteqartut pillugit. Tassami eqqumffigilluinnarparput aningaasartornerulissutaasussanik nuna tamakkerlugu inatsisartut akuersissappata, taava aningaasat aamma malinnaatinneqartariaqarmata, taamaalilluni kommunet aningaasatigut pitsaanngitsumik sunnerneqannginnissaat qulakkeerneqassammat, borgmesteri erseqqissaavoq.
Akiviusut aallaavigalugit sulineq siunissamut qulakkeerinninneruvoq
Assersuutigalugu kommunet ukiut ingerlanerini inissianik attartortittakkanik akiviusut aallaavigalugit annertussusiliisalernikuupput, paarlattuanilli namminersorlutik oqartussat inissiaataanni ineqarnermut akiliutit ukiut ingerlanerini politikkikkut aalajangikkamik nikisinneqarnaveersaarlutik.
Taaneqartup kingulliup malitsigisaanik namminersorlutik oqartussat inissiaataani ataavartumik aserfallatsaaliuinerit iluarsaaqqinnerillu kinguaattoorutaagaluttuinnarput, illuatungaani kommunit inissiaataanni aserfallatsaaliugassanut iluarsagassanut malinnaasinnaanerat pitsanngoriartuinnarluni.
Kommune Qeqertalik akit piviusut naapertorlugit inissianik attartortittakkanik ineqarnermut akiliummik annertussusiliisartunut ilanngunnikuuvoq.
Tassunga tunngatillugu borgmester Ane Hansen (IA) naammagisimaarinnippoq kommunip 2022-mi ineqarnermut akiliut 10 procentimik qaffaavigisimammagu kingornalu ukiumut 3 procentimik qaffaavigisarlugu:
- Soorunami innuttaasut ilaasa ineqarnermut akiliutip qaffaaviginera akerleraat. Kisianni malugaara misigalugulu innuttaasut amerlanerit kommunip inissiaataani najugaqartut inigisaminnut naammagisimaarinninnerat pitsanngoriartortoq, borgmesteri oqaluttuarpoq nangillunilu:
- Attartortut takusinnaavaat allannguuteqartoqarnikuusoq taamani attartornermut akigititat nikisinneqartannginnerannut sanilliullugu, tassami maanna kommunip inissiaatiminik ataavartumik aserfallatsaaliuinermut iluarsaasseqqinnermullu ingerlatsinera annertusiartuinnarpoq, taamanikkut inissat qimatat qalipalaaginnarlugit natiilu lakkilaaginnariarlugit attartortussanut allanut tunniunneqartarsimanerannut sanilliullugu, borgmester Ane Hansen (IA) oqaluttuarpoq.
