MINISTERI SPIRALILERSUINEQ PILLUGU SULIAMI NUTAARSIASSAATEQARTOQ
Danmarkimit taarsiissutit siulliit aappaagu tunniunneqassapput
Danmarkimi peqqissutsimut ministeri Kalaallit Nunaannut sapaatip-akunnerani matumani tikeraarnermini arnanut spiralilersuisimaneq pillugu suliami eqqugaasunut nuannersumik nutaarsiassaateqarpoq.
Danskit peqqissutsimut ministeriata Sophie Løhedep arnat spiralilerneqarnikut naapippai. Assut killitsinnartoq oqarpoq.
Assi: Jens Dresling/Ritzau Scanpix
Danskit peqqissutsimut ministeriat Sophie Løhde (Venstre) ulluni makkunani Kalaallit Nunaanniippoq. Tassani ilaatigut peqqissutsimut inuillu innarluutillit pillugit naalakkersuisoq Anna Wangenheim (D) peqatigalugu arnat spiralilersuinermut tunngatillugu suliami eqqartuunneqarsimasut ataatsimeeqatigai.
Taakkununngalu nuannersumik nutaarsiassaqarpoq.
Danskit naalakkersuisuisa saammaasseqatigiinnisamut aningaasaateqarfik pilersinniarlugu siusinnerusukkut nalunaarutiginikuuaat, taannalu kalaallinut arnanut 1992 sioqqullugu akuersiteqqaarnagit naartunaveersaaserneqarsimasunut aningaasatigut taarsiissuteqarnissamut atorneqarsinnaassalluni.
Aningaasatigut taarsiinissaq Danmarkimi inatsisitigut aalajangersarneqassaaq, 2026-milu ukiup affaani siullermi atuutilernissaa naatsorsuutigineqarluni.
Tamanna nunamut namminermut peqqissutsimullu ministereqarfimmit tusagassiuutitigut nalunaarummi ilisimatitsissutigineqarpoq.
Inatsit atuutilersinneqareerpat arnat eqqugaasut aningaasatigut taarsiiffigineqarnissamik qinnuteqarsinnaalissapput, 2026-milu ukiup affaani kingullermi akiliinerit siulliit isumagineqarnissaat naatsorsuutigineqarpoq.
Killitsinnartoq
Sophie Løhde arnat ilaat spiralilersuinermi suliami eqqugaanikut marlunngornermi naapippai. Killitsissimaqaarlu.
- Naalakkersuisoq kalaaleq suleqatigisara peqatigalugu ullumikkut kalaallit arnat sapiitsut naapitatta oqaluttuaat tusarlugit assut killitsinnarpoq.
- Arnat inuusuttuaraallutik akuersinikuunatik qanoq ilillutik spiralilersinneqarsimanersut tusarlugu assut killitsinnarpoq. Pisimasut allanngortissinnaanngilavut, ilinniarfigisinnaavagulli, taamaalilluta sumiginnaanermik arnat misigisimasaasa assinganik pisoqaqqinngisaannarniassammat, oqarpoq.
Anna Wangenheim aamma peqataavoq, arnallu oqaluttuaat aamma killitsissutigalugit.
- Spiralilersuisimaneq pillugu arlaannaanulluunniit attuumassuteqanngitsumik misissuineq qaammammi kingullermi saqqummersinneqartoq atuarlugu allaavoq, aammali namminneq misigisaminnik oqaluttuartut tusaallugit aamma anniaataat nukittussusiallu malugalugit allarluinnaavoq.
- Arnanut ataatsimiinnermi peqataasunut namminnerlu misigisatik pillugit sapiissuseqarlutik oqaluttuartunut assut ataqqinnippunga. Taamaaliorniaraanni nukittusariaqarpoq. Sukkasuumik peqqissaartumillu malitseqartitsinissap pingaaruteqassusia misigisaannit erseqqissarneqarpoq, oqarpoq.
Danmarkimit Kalaallit Nunaannillu taarsiisoqassasoq
Arnanut kalaallinut taarsiissuteqarnissaq pillugu danskit naalakkersuisuisa Naalakkersuisut suleqatigaat.
- Tikeraarnerma nalaani Naalakkersuisumik kalaallimik suleqatinnik Anna Wangenheimimik saammaasseqatigiinnissamut aningaasaateqarfik pillugu oqaloqatiginninnera ingerlalluarpoq, tassani ilaatigut qanoq ililluta pitsaanerpaamik aaqqissuussinermik pilersitsinissaq pillugu suleqatigiissinnaanerluta eqqartorparput, Sophie Løhde oqarpoq.
Arnat 1992-ip kingorna spiralilersuineq pillugu suliamit eqqugaasut taarsiivigineqarnissaminnut Naalakkersuisut qinnuteqarsinnaalereerput.
Ministeriuneq Mette Frederiksen (Socialdemokraterne) aamma Naalakkersuisut siulittaasuat Jens-Frederik Nielsen (D) arnanut pinngitsaalillugit naartunaveersaaserneqarsimasunut septembarimi utoqqatserput.
