Danskit ilanngaaserisui aningaasanik millioninik sinnilinnik Kalaallit Nunaanneersunik nassaartut
Københavnimi ilanngaaserisut ullumi ataatsimi aningaasat 1,7 millionit koruunit sinnillit kuffertini assigiinngitsuniittut nassaaraat.
Kufferti aningaasarpassuarnik imalik imatut assilillugu paasineqartarpoq. Unali asseq 2022-mi millionilikkaanik aningaasanik nassaartoqarnerani assilisaavoq.
Foto: Toldstyrelsen
Københavnip mittarfiani ilanngaaserisut kuffertit Kalaallit Nunaanneersut misissortillugit millioninik oktobarip 21-ani nassaartut Danskit ilanngaaserisui paasissutissiipput. Aningaasat katillugit 1,7 millionit koruunit kuffertinut arlalinnut agguataarsimasut ilanngaaserisut nassaaraat.
- Aningaasanik anngiortumik eqqusseriaraluartorpassuusartut
ajoraluartumik takusarparput, uumalu pisup tamanna
ukkatariinnassagipput takussuserpaa. Qimmigut ilanngaaserisuvullu
pikkorissut amerlapput, taakkulu suut misissussanerlugit ilisimavaat,
misissuisaannassaagullu taamaalillutik nakkutilliinermik
suliaqarluaannassalluta, Mette
Helmundt, Københavnip Mittarfiani ilanngaaserinermut aqutsisoqarfiup nakkutilliiffiani aqutsisoq, oqarpoq.
Angalasut marluk
Angalasut marluk angalaqatigiinngitsut pineqarput. Qaqortumiit angalasoq 1,19 millionit koruuninik nassarpoq, aappaalu Nuummiit kuffertimini 561.400 koruunit nassarpai. Aningaasat silaannaarlugit poortukkat kuffertit ikerinut ilineqarsimapput.
- Aningaasarpassuit pinerluuteqarnermi attaveqarfiit aningaasanik assartuiniarsimanissaannut aningaasanillu malunnarunnaarsaagaluarniarnissaannut takussutaasinnaapput, taamaammat Danmarkimiit Danmarkimullu angalasut nakkutigilluarpagut, Ilanngaaserinermut Aqutsisoqarfimmi misissuinermut pisortaq, Jeppe Kjærgaard oqarpoq.
Nakkutilliisarneq Danmarkip Kalaallit Nunaatalu akornanni ilanngaaserinikkut suleqatigiinnerup nukittorsarneqarneranut ilaavoq.
Nunat marluk akornanni ikiaroornartunik aningaasanillu anngiortumik eqqussuisarneq pinaveersaartinniarlugit oqartussat akornanni ataqatigiissumik maanna nakkutilliisoqarpoq, Ilanngaaserinermut aqutsisoqarfik ilisimatitsivoq.
