Demokraatit Sermersuumi borgmesteri IA-meersoq tapersersorpaat

Kommuneqarfik Sermersuumi qinersineq naligiiffiungaatsiarpoq. Inuit Ataqatigiit ilaasortaatitaat marlunnik ikileriarput Siumumiillu 200-t sinnilaarlugit qinerneqarnerullutik amerlanerussuteqalaarlutik.

Borgmesteri Avaaraq S. Olsen (IA) Siumup qinigassanngortitaanit Martha Abelsenimit, taaguunneqarnerpaamit, aamma ajorsartinneqarpoq.

Taamaakkaluartoq Avaaraq S. Olsen borgmesteritut ingerlaannassaaq, Inuit Ataqatigiimmi Demokraatillu kommunalbestyrelsimi suleqatigiinnissamik isumaqatigiissuteqarmata.

Partiit taakku marluk kommunalbestyrelsimi ilaasortanit 19-iusunit aqqanillit ilaasortaraat. Poul Petersenilu (D) borgmesterip tulliatut siullertut atuuffeqalerpoq.

Avaaraq S. Olsen isumaqatiginninniarnerit inerneri nuannaarutigai:

- Kommunalbestyrelsimi pitsaasumik sulinitta ingerlateqqiinnarnissaanut periarfissaqarnerput nuannaarutigeqaara. Demokraatinik suleqatigiinnissamik isumaqatigiissutitsinni inuiaqatigiinni suliassaqarfinni qitiusut ukiuni aggersuni pitsanngorsarneqartussat ukkatarineqarput.

- Meeqqat inuusuttullu pingaartumik qitiutinneqarput, tassani atugarissaarneq, paaqqutarinninnermi neqeroorutit aamma pitsaaliuinermi suliniutit annertuumik pingaarnerutinneqassallutik. Peqatigitillugu utoqqarnut aamma inunnut innarluutilinnut atugassarititaasut pitsanngorsarneqarnissaat pingaartippagut, pitsaanerusumik tapersersorneqarnissaannik aamma ulluinnaasa naleqarluartuunissaannik qulakkeerinninnissaq siunertaralugu, Avaaraq S. Olsen kommuneqarfiup nittartagaanut oqarpoq. Partiit suleqatigiinnissamik isumaqatigiissut tassani aamma atuarneqarsinnaavoq.

Siumut arfineq-marlunnik Nalerarlu ataatsimik kommunalbestyrelsimut ilaasortaatitaqalerput, partiillu taakku marluk kommunalbestyrelsimi tassa illuatungiliuttunngorput.

Ataatsimiinneq inissitsiterfiusoq apriilip 30-ani pissaaq.