Demokraatit sinniisussaasa allattorsimaffiat annikillivoq
Nalunaaquttap akunneranik sivisussusilimmik Inatsisartuni ilaasortanngortut qinigaasinnaanerup misilinneqarnera ataatsimiissutigaat. Ataatsimiinneq matoqqasumik ingerlanneqarpoq, taamaattumik paasissutissanik pissarsisoqarsinnaanngilaq. Kisianni inuit attaveqaqatigiiffiinik qimerluuinikkut maluginiagassaavoq Demokraatit arlalitsigut eqqugaasut.
Assiliisoq: Arnaq Nielsen
Demokraatit siulittaasuat naatsorsuutigineqartutut Naalakkersuisut siulittaasunngorpoq, taamatuttaaq taassuma Naalakkersuisoqatissai naalakkersuisutut atuutilersinneqarput.
Tamannali sioqqullugu, Inatsisartuni ilaasortat nutaat matoqqasumik ataatsimiipput qinigaasinnaaneermut misilitsinnermut tunngatillugu, tassanilu ataatsimiinneq nalunaaquttap akunneranik sivisussuseqarpoq.
Nalinginnaasumik Inatsisartut ataatsimeerngaarneranni ajornartorsiuteqarfiuneq ajorpoq, tassanilu qulakkeerniagassaasarluni Inatsisartuni ilaasortanngortut sinniisussallu qinigaasinnaanermik misilinneqarnerminnik naammassinnissinnaanersut.
Taamaakkaluartoq, matoqqasumik pisut tusagassiorfinnut paasiniaaffigiuminaatsuunngillat, tassami matoqqasumik ataatsimiinneq sivitsoriartortillugu allatigut paasiniaanerit ingerlasinnaasarmata.
Qineqqusaarlutik sassarsimasut inuit attaveqaqatigiittarfiini saqqummiussaat qimerluulaaraanni - qinigassanngorteqqammertut - tamanut siammarsimasaat takullugit, paasinarpoq Inatsisartuni ilaasortanngortoq ataaseq nammineerluni tunuarniuteqarsimasoq, arlallillu inatsisartuni ilaasortanngorsinnaanatik nalilerneqarsimasut.
Demokraatit taamatut pisoqarneranni sakkortuumik eqqugaasutut isikkoqarput. Siullertut sinniisussat pingasut tamarmik Inatsisartut ataatsimeerngaarnissaannut aggersagaasimanngillat. Tassalu, Leo P. Jørgensen (69), Hans Erik Enoksen (50) aamma Aqissiaq Semsen (48).
Jens-Frederik Nielsen: Kialuunniit nammineq qanoq iliornissani aalajangigassarivaa
Demokraatit siulittaasuat, Jens-Frederik Nielsen, Sermitsiamut oqarpoq, partiip sassartitassani ajunngitsumik piareersarsimagai, taamatullu sassarnermi aammalu qinigaanermi akisussaaffiit nassatarisagai suunersut aamma pillugit.
Kisianni sinniisussat pingasut siulliit tunuarput, naammattumik suliaqarsimavisi?
- Isumaqarpunga partiimi sassartitassagut piareersarlugit ajunngitsumik pitsaasumillu iliuuseqarsimalluta. Tamatuma saniatigut kialuunniit nammineq aalajangissavaa qanoq iliussanerluni. Ataqqivakka sassartut tunuarniarlutik aalajangersimassappata.
Kisianni maluginiagassaavoq sinniisussat pingasut siulliit namminneq tunuarsimanngikkunik qinigaasinnaanngitsutut nalilerneqartut (tusarfiit: inuit attaveqaqatigiittarfiisigut saqqummiussat). Inatsisartunut sassarnermi akisussaaffiit inuup naammassisassai pillugit ilitsersuussinersi naammassimava?
- Aap, sassarnerup malitsigisartagai pillugit isumaga malillugu ilitsersuilluarnikuuvugut, uteqqiinnassavaralu inuit namminneq tunuarniarlutik aalajangersimappata, tamanna pillugu akornuserniarnavianngilakka.
