Demokraatit suli borgmesterinngortitsisinnaasut
Kristian Jeremiassen IA-meersoq maanna Kommune Qeqertalimmi Demokraatit Nalerarlu isumaqatigiissuteqarfiginissaat isumalluarfigilerlugu, Simigaq Heilmannilu kommunimi borgmesterinngortussatut toqqarsimallugu marlunngornermi nalunaarpoq.
Kristian Jeremiassenip suleqatigiit nutaat Demokraatinit, IA-mit Naleqqanilu ilaasortallit poorski sioqqullugu saqqummiunneqassasut naatsorsuutigalugu oqarpoq
Assi nammineq pigisaq
Kommune Qeqertalimmi Siumut qinersinermi ajugaarujussuaraluartoq ajorsarujussuaannarsinnaavoq.
Siumup borgmesterinngortussaq, Aqqalu Reimer Frantz Lundbladiluunniit, pillugu nalunaarutigisartagai allanngorartuartarmata Naleqqameersoq Jens Vetterlein Siumumik Atassummillu suleqateqarunnaarsimasoq, sapaatip akunnerata naanerani saqqummiunneqarpoq.
IA-meersoq Kristian Jeremiassen kommunimi suleqatigiilersussat nutaat IA-meersut, Naleqqameersut Demokraatimeersullu poorski sioqqullugu saqqummiunneqarsinnaassasut, Simigaq Heilmannilu (D) borgmesterinngortussanngortinneqassasoq isumalluarluni marlunngornermi oqarpoq.
Inuttut qinersisit eqqarsaatigigaanni Simigaq Heilmann kommunimut qinersinermi qinerneqarnerpaavoq. 204-nit qinerneqarpoq, partiilu sisamanik ilaasortaatitaqarnissartik qulakkeerpaat.
Kristian Jeremiassen naapertorlugu maanna D (sisamanik ilaasortaatitaqartut), IA (pingasunik ilaasortaatitaqartut) aamma N (ataatsimik ilaasortaatitaqartut) amerlanerussuteqalaarlutik Simigaq Heilmann borgmesterinngortissinnaavaat.
Taamaassappat Demokraatit Kommune Kujallermi aamma qinerneqarluaramik Malene Vahl Rasmussenip (D) borgmesterinngortussatut isumaqatigiissutigineqarnerata kingorna aappassaanik borgmesterinngortitsissapput.
Kommunalbestyrelsip ivertinneqarneranut atatillugu ataatsimiinneq maajip aappaani pisussatut ilimagineqartoq Kristian Jeremiassen ilisimatitsivoq.
Isumaqatiginninniarnerit suli ingerlasut Simigaq Heilmann Sermitsiamut oqarpoq. Kristian Jeremiassens poorskertinnagu isumaqatigiissuteqartoqarsinnaaneranik isumalluarnera taperserpaa, sulili inissittoqanngitsoq Sermitsiamut naqissuserpaa:
- Sunaluunnit suli inississimanngippat taava aqaguusinnaanngilaq, Simigaq Heilmann marlunngornermi oqarpoq.
