KOMMUNUNINUT QINERSINEQ 2025
Demokraatit sumiiffinni ajugaanerat Kujallermi aallartippoq
Kommune Kujallermi kommunalbestyrelsimi qinigaaffimmut 2021-2025-mut qinersinermi Demokraatit peqataanngillat. Taamaattorli qinigaaffiup ingerlanerani partii pingasunik ilaasortanngortitsivoq, Siumumeersut pingasut qinigaaffiup ingerlanerani Demokraatinnut nuummata. Kommunalbestyrelsimut qineqqusaarnermi matumani partii Kommune Kujallermi tamatumuuna 13-inik qinigassanngortitsivoq.
Margrethe Thårup Andersen (D) Minik Serano Frederiksenilu (D) maanna Inatsisartunut nutaanut Kujallermit parteertik sinnerlugu ilaasortanngorput. Taakku aamma Kommunalbestyrelsimut qinersinissamut Kujallermi parteeqatitik aqqanillit peqatigalugit sassarput.
Asseq nammineq pigisaq
Tamanna aallartippoq marsimi 2023, Siumumeersoq Margrethe Thårup Andersen partiimit tunuarmat Demokraatinullu ilanngulluni.
Ukioq ataaseq qaangiummat, tassa marsimi 2024-mi, Siumup kommunalbestyrelsimi ilaasortai, Simon Simonsen aamma Karen Marie Kyed Frederiksen, aamma taamaaliorput, tassa Demokraatinut nuullutik.
Partii kommunalbestyrelsimut qinigassanngortitsisimanngitsoq taamaasilluni Kommune Kujalleq kommunalbestyrelsiani inissanit 15-iusunit inissat pingasut pissarsiarai.
Maanna qinigaaffik taanna qaangiuppoq. Apriilip aallaqqaataani Kalaallit Nunaanni innuttaasut kingumut qinersissapput, tamatumuuna kommunalbestyrelsimi ilaasortat nutaat qinerneqassallutik.
Qinigassanngortittut 13-it
Inatsisartunut qinersineq maanna naammassivoq, qinersisartut isummereerput Demokraatinut piginnaatitsissut tunniullugu nunap politikkiani siuttooqqullugit.
Demokraatit sinnerlugit qineqqusaartut marluk Kujataaneersut Inatsisartuni inissipput, tassaappullu Margrethe Thårup Andersen aamma Minik Serano Frederiksen.
Taakku aamma kommunalbestyrelsimut qinigassanngortipput parteeqatitik allat aqqanillit peqatigalugit.
Qanoq pisoqassava? Partii sinnerlugu Inatsisartuni ilaasortanngortut aappa, Margrethe Thårup Andersen Sermitsiamit oqaloqatigaarput:
- Assut qujamasuppugut Inatsisartunut qinersinermut atatillugu innuttaasut tatiginninnerat annertooq pillugu, tamanna pisussaaffiliivoq aammalu akisussaaffik tigussavarput pitsaanerpaamillu sulississaagut.
- Inatsisartunut qinersinermut tunngatillugu, maanna naalakkersuisooqatigiinnik pilersitsisinnaanermut periarfissat misissorneqaleruttorput, tamatta siulittaasutsinnut tunuliaqutaavugut tapersersorlugulu inuiaqatigiinnut politikkikkut aaqqiissutissamik pitsaasumik nassaarniarnerani.
Aamma kommunalbestyrelsimut qinigassanngortippit, qanoq iliussavit aperissagaluarpatit Naalakkersuisuutitaminut ilaasortaasinnaanersutit?
- Pisussat tamaasa aqqusaassavagut aammalu qularinngilara aaqqiissutissamik nassaarumaarluta, nuna tamakkerlugu politikkikki kommunalpolitikkilu isumagineqassapput. Aperissagaluarpanga, soorunami peqataassaanga, tassami soorunami siulittaasutsinnut tunuliaqutaavugut nangittumillu tunuliaqutaassaagut aammalu aqutsinerani tamakkiisumik tapersersussavarput.
Taavami illit parteersilu qinersinermi taaguunneqarluassagussi, parteersilu borgmesterinngortitsisinnaalluni inississagaluarpat, borgmesterissatut aalajangersimasumik qinigassanngortitsivisi?
- Akornatsinni qinigaanerpaaq, aamma tassaajumaarpoq isumaqatigiinniartoqassappat siuttoriumaagarput kommunimi aqutseqatigiinnissamik isumaqatigiissusiortoqassappat, taamaalillunilu taaguunneqarluarnerpaaq borgmesteritut inississinnaanissaminut periarfissaqassaaq, taamaattumik eqqarsaatersuuterpassuaqarnarpoq piffissaq manna, taamatuttaaq apriilip aallaqqaataani kommunalbestyrelsimut qinersinissamut atatillugu qineqqusaarnermik ingerlataqarpugut.
Kingumut qiviarneq: Torersaariaraluarneq tukassaanertalik
Margrethe Thårup Andersen aamma kommunalbestyrelsimi suleqatini marluk, Karen Marie Kyed Frederiksen aamma Simon Simonsen, qinigaaffimmi maanna qaangiuttumi, Kommune Kujallermi aningaasaqarnerup ajornartorsiortitsinerujussua iluarsiniarlugu sulineq isornartorsiortarpaat:
- Kommunalbestyrelsimi suleqatigiinnut ilaagaluarpugut, kisianni tusaaniarneqannginnatta tunuartariaqarnikuuvugut. Kommunip aningaasaqarneranik misissuilluarnissamik aaqqissuussinermik piumasaqaateqarnitsinni, siusissukkut ilungersuuteqaraluarnerput aamma kinguneqanngimmat. Misigisarput tassaavoq iluarsaassiniaraluarnermi qaavatigut aamma nammineq pilersitanik tukassaasoqartartoq, assersuutigiinnarlugu akileraarutit akilerneqanngitsut, tamatumalu malitsigisaanik ajornartorsiortitsinermik akisussaaffimmik tigusiumannginneq. Kiisa maanna kommuni sulisunik soraarsitsinerit ingerlanneqalerput.
Margrethe Thårup Andersen (D) aamma ilisimatitsivoq Demokraatit Kujataani kommunimut qinersinermi ajugaassagaluarpat, taava kommunip aningaasaqarneranik tamakkiisumik misissuineq ingerlanneqassasoq, taamaalilluni taamatut inissisimanerup uteqqinnginnissaa qulakkeerniarlugu.
- Innuttaasut aamma inuussutissarsiortut iluarsiivigineqarnissamik, patajaatsumik ingerlatsisoqarnissaanik aamma aaqqissuussinermik tutsuiginartumik pisariaqartitsipput, taanna naggasiivoq.
