DMI sumiiffinni arlalinni anorersuarnissaanik aarlerisaarivoq
Nuummi, Kapisilinni, Qeqertarsuatsiaani, Paamiuni kiisalu Kommune Kujallermi pingasunngornerup unnuaaniit ualimut anorersuarnissaa ilimagineqarpoq. Tasiilami sisamanngornermi anorersuarnissaa ilimasaarutaavoq. Kommunip innuttaasut anorersuarmut piareersaqqullugit kajumissaarpai.
Anorersuaq.
Assiliisoq: Leiff Josefsen
Kujataani Kitaanilu pingasunngornermi januaarip 29-ani Tasiilamilu sisamanngornermi januaarip 30-ani anorersuarnissaa aarlerisaarutigineqarpoq.
Anori 20-30 m/s-ip akornanni sakkortussuseqassasoq, tassa Paamiuni 30 m/s-ip tungaanut anorlernissaa Nuummi Kujataanilu 36 m/s-ip tungaanut anorlernissaa DMI-p aarlerisaarutigaa.
Innuttaasut anorersuarnissaanut piareersarlutillu pigisatik isumannaassagaat Kommuneqarfik Sermersooq Facebookimi quppernermini allappoq. Pingaartumik Kapisilinni Qeqertarsuatsiaanilu anorersuarujussuarnissaa naatsorsuutigineqarpoq:
- Kapisilinni Qeqertarsuatsiaanilu innuttaasut piumaffigineqarput pigisat tingissinnaasut aalajangersornissaat, tassani sanaartornermut atortut, umiatsiat assigisaallu pineqarput.Pinartoqartillugu Upalungaarsimasut 113-imut sianerluni attavigineqarsinnaapput, kommuni allappoq.
Timmisartuussinissat allannguuteqartut
Kommune Kujallermi anorersuarnissaanik aarlerisaarut pissutigalugu Air Greenlandip pingasunngornermi timmisartuussinissai allanngortinneqarput.
Ilaasut eqqugaasut angalanissamik pilersaarummik nutaamik piaarnerpaamik isumagineqassasut timmisartortitseqatigiiffik nittartakkamini allappoq.
- Pissutsit tamakku ilaasussatsinnut persaqqusersuinerat ajuusaarutigaarput, neriorsuutigaarpullu sapinngisarpulli tamaat angalasut piaarnerpaamik apuunniassallugit, Air Greenland allappoq.
