Dronit kissaatigineqanngitsumik timmioraarnerat pillugu Mette F. Europami suleqatiminik oqaloqateqarpoq

Ministeriunerup Mette Frederiksenip (S) ilaatigut dronit Københavnip mittarfia qulaallugu ataasinngornermi unnukkut timminerisa kingorna „dronit kissaatiginngisamik timmioraarneri“ pillugit Europami siuttut arlallit marlunngornermi oqaloqatigai.

Taakkua ilagaat Norgemi ministeriuneq Jonas Gahr Støre, Sverigemi ministeriuneq Ulf Kristersson, NATO-mi generalsekretæri Mark Rutte, EU-mi ataatsimiitsitaliarsuup siulittaasua Ursula von der Leyen kiisalu Europami Siunnersuisoqatigiinni siulittaasoq Antonio Costa.

Ministeriuneq inuit nittartakkatigut naapeqatigiittarfianni X-imi taama allappoq.

- Piffissami kingullermi ernumanartunik pisoqarpoq. Rusland silaannakkut killeqarfinnik unioqqutitsivoq. Dronit Europami nunani arlalinni kissaatiginngisamik timmioraarput.

- Piffissaq inuuffigisarput ersarissumik eqqaasitsissutigineqarpoq. Eqqissineq isumannaassuserlu illersussavagut.

Ursula von der Leyenip Mette Frederiksenimik oqaloqateqarnini aamma X-imi allaaseraa.

- Piviusut suli paasineqanngikkaluartut killeqarfitsinni aaqqiagiinngissuteqartoqartuartoq erseqqippoq. Attaveqaasersuutigut pingaarutillit ulorianartorsiorput, Europallu ulorianartorsiorneq tamanna sakkortuumik aalajangersimalluinnartumillu akiussavaa, von der Leyen marlunngornermi ualikkut allappoq.

Københavnip mittarfiani droninik takusaqartoqarneranik politiit ataasinngornermi unnukkut nalunaaqutaq 20.30 nalunaarfigineqarput. Kingorna mittarfimmut mittarfimmiillu timmisartumik angallanneq tamarmi akunnerni sisamani unitsinneqarpoq.

Dronit anginerit arlallit takuneqarput, sammivinniillu assigiinngitsuniit takkupput. Dronit saassussinissaannut takussutissaqanngitsoq Københavnimi politiit erseqqissaapput.

Dronit suminngaanneernersut, sumukarnersullu kikkunnilluunniit pigineqarnersut naluarput.

Mette Frederiksenip marlunngormat pisimasoq „qallunaat attaveqaasersuutaannut pingaarutilinnut saassussinertut maannamut ajornerpaatut“ taavaa.

Københavnip mittarfiani pisoq „russit qallunaat silaannartaannik unioqqutitsinerattut“ Ukrainep præsidentiata Volodymyr Zelenskyjip marlunngornerup unnuaani oqaatigaa.

Russit pinerlunnermut pisuunersut danskit oqartussaasuisa uppernarsarsinnaanngilaat.

- Soorunami kina pisuunersoq oqaatigissallugu periarfissat tamaasa eqqarsaatigisinnaavagut, Mette Frederiksen marlunngornermi qallunaat tusagassiorfiinut arlalinnut oqarpoq.

- Tamannalu piffissami kingullermi droninik saassussinerit, silaannakkut killeqarfinnik unioqqutitsinerit Europamilu mittarfinnut qarasaasiatigut saassussinerit pillugit paasisatsinnut naapertuuppoq.

Rusland Københavnip mittarfiani dronit qulaavaanerannut attuumassuteqannginnerarpoq.

/ritzau/