Emanuel Núko politikkimiikkunnaavippoq
Emanuel Núko eqqartuussivimmi suliamut atatillugu akiligassinneqarnera pissutigalugu kommunalbestyrelsimut ilaasortaasinnaanngitsoq, juulip sisamaani Qinigaasinnaanermut Ataatsimiititaliaq aalajangerpoq.
Assi: Kommuneqarfik Sermersooq
Emanuel Núko (N) 2023-mi ukiakkut eqqartuussinermi 1.500 koruuninik akiligassinneqarsimanini pissutigalugu Kommuneqarfik Sermersuumi kommunalbestyrelsimut ilaasortaasinnaanngilaq.
Taama Namminersorlutik Oqartussat sisamanngornermi juulip 18-ianni naatsumik nalunaaruteqarput.
Emanuel Nûko eqqartuussivimmi eqqartuunneqarami nakuusersimasutut pinngitsuutinneqarpoq, politikkerili suliami eqqissiviilliortitsisimasutut akiligassinneqarsimavoq.
Pele Brobergip (N) kommunalbestyrelsimut qinigaasup kommunimut allamut nuunnerata kingorna, 2023-mi ukiakkut Emanuel Núko Kommuneqarfik Sermersuumi kommunalbestyrelsimut ilaasortanngorpoq.
Emanuel Núko taarserlugu Finn Karlsen (N) kommunalbestyrelsimut ilaasortanngornissaa ilimanarpoq.