SIUMUT
Eriup Jens-Frederimmut saassussinera Vivianip illuatungilerpaa
Siumup siulittaasorisimasaata, Erik Jensenip, Naalakkersuisut siulittaasuat Jens-Frederik Nielsen (D) politikkikkut saassuppaa Demokraatit qinersisartunik mitalliisimanerarlugit pasillerlugit. Taassuma piumasaraa Siumut eqqarsaqqittariaqartoq naalakkersuisunit aninissaq siunertaralugu. Siumup siulittaasua, Vivian Motzfeldt, parteeqatiminut maanna akerliliilluni qisuariarpoq.
Erik Jensen aamma Vivian Motzfeldt Siumup qinersinerup unnukkuani Katuami oqaloqatigiittut. Partii qinersinermi ajorsarpoq Erik Jensenilu akisussaaffimmik tigusilluni siulittaasutut tunuarpoq.
Assiliisoq: Oscar Scott Carl
Erik Jensen, Inatsisartunut qinersereernerup kingorna Siumumi siulittaasutut tunuartoq KNR aqqutigalugu naalakkersuisooqatigisaminnut Demokraatinut taakkulu siulittaasuaanut, maanna naalakkersuisut siulittaasorisaannut, Jens-Frederik Nielsenimut saassussivoq.
Saassussinerminut ilutigitillugu Erik Jensenip ilanngullugu piumasaraa Siumut naalakkersuisooqatigiinnit aninissamik eqqarsartariaqartoq, isumaqarami Demokraatit qinersinermi eqqunngitsumik tunngavilimmik ajugaasimasut.
Vivianip Erik eqqissisarpaa
Maanna Siumumi siulittaasup, Vivian Motzfeldtip, Erik Jensen partii sinnerlugu eqqissisarpaa:
- Erik Jensenip Demokraatit siulittaasuat qinersisartunik mitalliisimasutut pisuutippaa, Siumumiit erseqqissassavarput naalakkersuisooqatigiinni peqataalluta, tamannalu nalornisigineqassanngilaq, Vivian Motzfeldt naqissusiivoq nangillunilu:
- Ilaatigut Inatsisartut suliluunniit ataatsimiinnikuunngitsut taamatut oqaaseqarnissaq inissaminiinngilaq, inatsisinimmi allannguisoqassappat Inatsisartut peqataatinneqartussaapput.
Vivian Motzfeldt-ip aamma naqissuserpaa soraarnerussutisiaqalernissamut ileqqaartussaatitaaneq pillugu suliap ingerlanneqarnerani parteertik sulinermi peqataassasoq:
- Siumut inuiaqatigiinnut ajunnginnerusoq ujartorlugu
qulequttami pineqartumi suleqataassasoq qularutigineqassanngilaq. Suliassat pingaarutillit torersumik nunap inuisa
siuttussamittut qinigai peqatigalugit suliassaapput - Asuli
assortuuterujoorluta ingerlassagutta angusaqarnavianngilagut, Vivian Motzfeldt (S) oqarpoq.
