EQQAGASSALERINEQ
ESANI 500 millioner koruuninik taarsigassarsivoq
Kommunit eqqagassaleriffimmik ESANI-p piginnittuusut namminersorlutik oqartussat peqatigalugit 500 millionit koruuninik sivisunerusumillu taarsigassanik qulakkeerinnipput, Nuummi Sisimiunilu ikuallaavissat naammassineqarsinnaaqqullugit.
Asseq toqqorsivimmit: Leiff Josefsen
ESANI A/S-ip siulersuisuni siulittaasoq, Nicolai Odgaard Jensen, attaveqaqatigiittarfik Linkedin aqqutigalugu nalunaarpoq ingerlatseqatigiiffik, juulip 18-iani 2025-mi, KommuneKredit-imit 500 millionit koruuninik aningaasalersorneqarnissamik qulakkeerinnissimasoq, ikuallaaviit nutaat marluk Nuummi Sisimiunilu sanaartorneqarnerannut atatillugu.
- Tamanna pingaarutilimmik alloriarneruvoq nunami tamarmi piujuaannartitsisumik avatangiisinullu naleqqussakkamik eqqagassalerinermik pilersitsinissamut - aammalu ukiuni 30-ni tulliuttuni akikittumik, patajaatsumik atuisunut aningaasartuutitigut tunngavissaqarluarpoq, Nicolai Odgaard Jensen oqarpoq.
Siulersuisuni siulittaasoq nassuiaavoq tamanna ima isumaqartoq:
- Teknologi nutaaq mingutsitsinerup aqunneqarneranik piginnaasallu iluaqutigineqarnissaannik sammisalik.
- Aaqqiissut ataatsimoortoq, avatangiisit, peqqissuseq ingerlatsinerlu isumannaatsoq Kalaallit Nunaat tamakkerlugu qaffassaasoq.
- Aningaasaqarnikkut attatiinnartumik isumannaassuseq, angerlarsimaffinnut eqqagassalerinermi akinik allanngoraqattaanngitsunik qulakkeerinninneq.
Eqqagassalerinermut tunngatillugu ataqatigiissaarinerup iluatsinnissaanut aningaasaqarnikkut eqqissisimaneq pissarsiarineqarpoq
KommuneKredit-imit taarsigassarsiat ESANI A/S-imut aningaasaqarnikkut patajaannerusumik inissisimalersitsivoq Nuummi Sisimiunilu ikuallaaviit naammassineqarnissaannut kiisalu illoqarfinnit nunaqarfinnillu allanit eqqakkanik assartuinermut atatillugu ataqatigiissaarinissamut.
Namminersorlutik oqartussat aamma naalagaaffik, KommuneKredit peqatigalugu, 2024-imi januaarimi isumaqatigiissummik atsioqatigiipput, nunatsinni kommuninut periarfissiisumik, taamatullu 4 milliarder koruuninik taarsigassarsisinnaanermut periarfissiisumik. Suliffeqarfiit ingerlatseqatigiiffiillu kommuninit pigineqartut aamma taarsigassarsiniarnissamut periarfissamik atuisinnaapput, taakkununnga ilanngullugu ESANI A/S, maannalu periarfissaq taanna ingerlatseqatigiiffiup atorluarsimavaa.
ESANI A/S-ip siulersuisuini siulittaasoq, Nicolai Odgaard Jensen, oqaaseqartinniarlugu Sermitsiamit sulissutigaarput.
