Illersornissamut ministeriaqarfik danskit sakkutuuinut sikusiutinik pitaarnialersaartoq
Issittumi danskit illersornissaqarfiata atugassaannik sikusiutinik ministeriuneq illersornissamullu ministeri soqutiginnilersimapput.
- Suut tamaasa suli aalajangiiffiginngilagut. Isumannaallisaanermulli atatillugu pissutsit ataatsimut isigaavut, tassanilu sikusiutit allat aamma eqqarsaatiginissaat ajornanngilaq, Mette Frederiksen oqarpoq.
Assiliisoq: Kimmo Brandt/EPA/Ritzau Scanpix
Danskit naalakkersuisuini siuttut illersornissamut ministeriaqarfiullu danskit umiarsuaat Issittumiittut sikusiutinik pisariaqartitsilersinnaanerannut piareersimalersimapput.
Issittumi Atlantikullu avannaani danskit illersornissaqarfiat annertusaasussanngoput, tassanilu sikusiutit pingaaruteqarsinnaapput.
Illersornissamut ministereqarfiup tamanna maluginiarpaa.
- Tamatumunnga atatillugu imartami sikusimasumi angalasinnaanerup pisariaqartinneqarnera eqqumaffigissallugu pingaaruteqarpoq, illersornissamut ministeriaqarfik Ritzauimut akissummini allappoq.
Illersornissamut ministeriaqarfiup taamatut nalunaaruteqarnera ministeriunerup Mette Frederiksenip tamatumunnga assingusumik soqutiginninneranik ersersitsinerata kingorna pivoq.
Sikusiut 2010-mi atorunnaartoq
Helsinkimi Finlandimiittumi Nato-p sapaatip-akunnerani kingullermi ataatsimeersuarnerani Mette Frederiksenip Finlandip præsidentia Alexander Stubb peqatigalugu sikusiut alakkarpaat.
Alakkaanermigut danskit illersorniqarfiannut sikusiutitaarusunneranik soqutiginninnini takutinneraa ministeriuneq aperineqarpoq.
- Suut tamaasa suli aalajangiiffiginngilagut. Isumannaallisaanermulli atatillugu pissutsit ataatsimut isigaavut, tassanilu sikusiutit allat aamma eqqarsaatiginissaat ajornanngilaq, Mette Frederiksen oqarpoq.
Danmark sikusiutinik siornatigut peqarnikuuvoq. Danskit sikusiutaat pingasut kingulliit illersornissaqarfimmi sipaarniartoqarnerani 2010-mi atorunnaarsinneqarput.
Sillimaniarnermut politikki pissutigalugu sikusiutit naalagaaffiit pissaanillit eqqumaffigilersimavaat.
Ruslandi minnerpaamik sikusiutinik 50-inik peqartoq
Issittumi umiarsuit nunap killeqarfiinut nakkutilliinerannut suliassanillu allanik suliaqarsinnanerannut angalasinnaanerat apeqqutaavoq.
Illersornissamut ministeri Troels Lund Poulsen (V) Folketingimi apeqquteqaatinut sapaatip-akunnerani kingullermi akissuteqarnermini Rusland "sikusiutinik ikinnerpaamik 50-inik, taakkunannga 13-it Issittumi sikumik aserorterisinnaasut, peqartoq“ ilisimatitsivoq.
Taakkua ilagaat sikusiutit atomimik ingerlatillit angisuut arfineq-marluk, Ruslandimi kisimi pigineqartut. Sulilu amerlanerusut sanaartornissaat pilersaarutigineqarpoq.
Kina maannakkut sisamanik sikusiuteqarpoq Issittup imartaani atorneqarsinnaasunik, Nato-milu nunat katillugit 13-inik sikusiuteqartut Troels Lund Poulsen paasissutissiivoq.
/ritzau/
