ISUMANNAALLISAANEQ ILLERSORNISSARLU
Illersornissaq Issittorlu oqaluuserineqassapput
Illersornissamut ministeri Troels Lund Poulsen Kalaallit Nunaanniippoq. Ullumi arfininngornermi taanna aamma nunanut allanut tunngasunut naalakkersuisoq, Vivian Motzfeldt innuttaasunik qaaqqusipput illersornissaq pillugu isumaqatigiissut taassumalu Kalaallit Nunaannut Issittumullu sunniutai oqaluuserineqassammata.
Kalaallit folketingimi ilaasortaatitaasa akornanni issittumi piginnaasat annertusarneqarnissaanik atuutsitsilernissaq pillugu sakkortuumik isummersortoqarpoq. Kisianni Naalakkersuisut aammalu danskit naalakkersuisui apeqqut pillugu allatut nipeqarput.
Assiliisoq (Arkiv): Illersornissamut ministeriaqarfik
Suli anguniagaavoq, Issittoq sakkutooqarnikkut annertusaaffiunngitsutut inissisimaffeqassasoq, taamaakkaluartoq nunarsuarmi isumannaallisaanikkut politikkikkut inissisimaneq nukittorsaasoq pisariaqartitsineranik ersersitsivoq Arktisimi isumannaallisaanikkut illersornissamullu politikkikkut suleqatigiinnerup nukittorsarnissaa Danmarkip Kalaallit Nunaatalu akornanni.
Issittumi piginnaasanik aningaasaliinissamut suliap ingerlanerani pingaaruteqarluinnarpoq, taamaalilluni ataatsimoorussamik paasinninneq anguneqassammat salliutitat periarfissallu pillugit Naalakkersuisut qanimut peqataanerat aalajangiisuulluinnarpoq, illersornissamut ministereqarfik nunanullu allanut tunngasunut allaffeqarfik tusagassiorfinnut nalunaarummi ilaatigut taamak erseqqissaasoqarpoq.
Illersornissamut ministerip marsimi tikeraarnerani, Nuummi katersortarfimmi innuttaasunik ataatsimiisitsineq ornigarneqarluartoq pissanganartorlu ingerlanneqarpoq. Maannakkut tikeraarnerani aamma innuttaasunik ataatsimiisitsisoqassaaq, GUX-imi, arfininngornermi ualikkut 15:00-16:30.
Assiliisoq (toqqorsivik): Leiff Josefsen
- Naalagaaffik sinnerlugu anguniarparput, Kunngeqarfimmi nunat akornanni suleqatigiinnerput suli nukittunerulersissallugu aaqqiissutissarsioqatigiinnerussasugullu. Tamanna atuuppoq illersornissamut isumaqatigiissutip ingerlateqqinnerani aammalu illersornissamut politikkimut nalinginnaasumik, illersornissamut ministeri Troels Lund Poulsen qarpoq nangillunilu:
- Illersornissaq pillugu Kalaallit Nunaannit kissaatigineqartut pillugit, isumannaallisaaneq pillugu politikkikkut oqaloqatigiinnissatsinnut, isumannaallisaanikkut politikkikkut inissisimaffik aammalu minnerunngitsumik Issittumi tunngaviusumik ilinniarfik, Arktisk Basisuddannelse ilanngullugit oqaloqatigiinnissatsinnut. Kingullermut tunngatillugu qinnuteqartorpassuit malitsigisaannik, taamatuttaaq ilinniartunit 22-iniit 19-it naammassinninnerisa malitsigisaannik, ukioq manna ilinnialertussatut tiguneqartut amerlisarusuppagut. Tamanna Kalaallit Nunaata aammalu Arktisip isumannaatsuunissaanut iluaqutaassaaq.
Vivian: Issittoq pillugu Issittumi eqqartuigutta pitsaaneruvoq
- Illersornissamut ministerip aammalu uanga suleqatigiinnerput Issittumi sakkutooqarnikkut politikkimut aammalu illersornissaq pillugu isumaqatigiissummut Naalakkersuisut akuutinneqarnerat nukittunerpaavoq, ministerip Kalaallit Nunaanni uteqqittuartumik tikeraartarneratigut oqaloqatigiinnerput qanittuararsuuvoq, nunanut allanut tunngasunut Naalakkersuisoq, Vivian Motzfeldt, oqarpoq nangillunilu:
- Isumaqarnerpaavormi issittoq pillugu issittumi oqaloqatigiikkutta. Qilanaarpunga oqaluusereqqissallugu qanoq ililluta Nunatsinni innuttaasut aammalumi suliffeqarfiit akuutinneqarnerpaasinnaanersut oqaloqatigiinnissamut, Issittumi illersornissaqarfiup suliassaasa ingerlanneqarneranni. Tamanna Kalaallit Nunaata nunarsuarmi allanngorartumi isumannaatsuunissaa aamma eqqarsaatigalugu, nunanut allanut tunngasunut Naalakkersuisoq, Vivian Motzfeldt oqarpoq.
Nuummi innuttaasunik ataatsimiitsitsineq pissaaq arfininngornerup ualiani nal. 15:00-16:30 GUX-ip inersuani. Kikkut tamarmik tikilluaqqusaapput, qaaqqusissummi erseqqissaatigineqarpoq.
